У сваёй пастанове № 370, 7 студзеня разьмешчанай на партале Pravo.by, Нацыянальны банк уносіць зьмены ў Банкаўскі кодэкс і ў свае пастановы «Аб бухгальтарскім уліку і справаздачнасьці», «Аб урэгуляваньні няплатаздольнасьці», «Аб стварэньні адкрытага акцыянэрнага таварыства „Банк разьвіцьця Рэспублікі Беларусь“».
Сярод іншага, там сфармуляваныя патрабаваньні палітычнай ляяльнасьці ад людзей, якія прызначаюцца на найвышэйшыя пасады ў фінансавай сфэры. Цяпер, акрамя кваліфікацыі і бездакорнай рэпутацыі, вымагаецца наяўнасьць палітычнай ляяльнасці, пацьверджаная «інфармацыяй, пададзенай дзяржаўным органам (яго тэрытарыяльным органам), упаўнаважаным на ажыцьцяўленьне захадаў папярэджаньня і выяўленьня пагрозаў нацыянальнай бясьпецы».
Фармальна ў інструкцыю аб правядзеньні Нацыянальным банкам ацэнкі адпаведнасьці патрабаваньням да кваліфікацыі і дзелавой рэпутацыі, аб атэстацыі і спэцыяльнай атэстацыі, зацьверджаную пастановай праўленьня Нацыянальнага банку Рэспублікі Беларусь ад 19 сьнежня 2012 г. № 669, уносяцца зьмены. Паводле новай пастановы праўленьня Нацыянальнага банку, дзяржаўны орган павінен пацьвердзіць, што атэставаны кіраўнік не заўважаны ў наступных дзеяньнях:
- удзеле у несанкцыянаваных масавых мерапрыемствах,
- парушэньні ўстаноўленага парадку правядзеньня сходаў, мітынгаў, вулічных шэсьцяў, дэманстрацыяў, пікетаваньня, іншых масавых мерапрыемстваў,
- а таксама ў публічных закліках да арганізацыі або правядзеньня такіх з парушэньнем устаноўленага парадку іх арганізацыі
- або ўдзелу ў любым відзе дзейнасьці, накіраваным на дыскрэдытацыю Рэспублікі Беларусь, органаў дзяржаўнай улады і кіраваньня, уключаючы асабісты ўдзел, пасярэдніцтва або супрацоўніцтва шляхам аказаньня паслуг,
- рэгістрацыі ў экстрэмісцкіх фармаваньнях,
- распаўсюдзе інфармацыйнай прадукцыі, уключанай у рэспубліканскі сьпіс экстрэмісцкіх матэрыялаў, а таксама выраб, выданьне, захоўваньне або перавозку ў мэтах распаўсюджваньня такой інфармацыйнай прадукцыі, — гаворыцца ў пастанове праўленьня Нацыянальнага банку.
Кваліфікацыйную камісію Нацыянальнага банку праходзяць кіраўнікі банкаў, іх намесьнікі, галоўныя бухгальтары і іх намесьнікі, кіраўнікі аддзелаў, незалежныя дырэктары і чальцы радаў дырэктараў.
Кваліфікацыйная камісія Нацыянальнага банку правярае таксама і сваіх супрацоўнікаў.
Тэрмін, цягам якога для службовай асобы дзейнічаюць вынікі кваліфікацыйнай праверкі, можа вагацца ад 1 да 5 гадоў.