Асуджаны за «садзейнічаньне экстрэмізму» хрысьціянскі прапаведнік застаецца пад вартай
У Гомельскім абласным судзе раней вынесьлі прысуд 41-гадоваму Аляксею Ягелу. Яго абвінавацілі ў «садзейнічаньні экстрэмісцкай дзейнасьці» (ч. 1 і 2 арт. 361-4 Крымінальнага кодэксу), піша «Вясна».
Пра Аляксея Ягелу вядома, што ён, з адукацыі лекар-хірург, эвангельскі прапаведнік, а таксама абаронца здаровага ладу жыцьця.
Паводле інфармацыі праваабаронцаў, Аляксею прысудзілі пазбаўленьне волі, цяпер стала вядома, што ён знаходзіцца ў гомельскім СІЗА-3.
Выпускніцу гістфаку зь Ліды асудзілі за «садзейнічаньне экстрэмізму»
Маргарыту Ясевіч зь Ліды асудзілі паводле ч. 1 і 2 арт. 361‑4 КК («садзейнічаньне экстрэмісцкай дзейнасьці»).
Маргарыце Ясевіч 29 гадоў. У 2018‑м скончыла гістарычны факультэт БДУ, спэцыяльнасьць «Музэйная справа і ахова гісторыка-культурнай спадчыны».
У 2020 годзе Маргарыта зарэгістравала ў Смаленску фірму «ВМ-ТОРГ». Апошнімі гадамі жыве ў Самахвалавічах пад Менскам, піша «Наша Ніва». Падобна, ёй прысудзілі «хатнюю хімію».
Менскую мастачку Аксану Шаляпіну асудзілі на 3 гады за дапамогу палітвязьням
Аксану Шаляпіну затрымалі ў чэрвені 2025 году і да суду трымалі ў менскім СІЗА-1. Суд над ёй пачаўся ў лістападзе, а сёньня яе пакаралі трыма гадамі зьняволеньня за тое, што яна дапамагла некалькім дзясяткам палітвязьняў, калі яны былі пад вартай, піша DissidentBY.
Аксане Шаляпінай 48 гадоў. Яна скончыла архітэктурны факультэт і з 2009 году займалася алейным жывапісам. Ейныя творы ёсьць у прыватных калекцыях розных краінаў.
У Беларусі прызналі «экстрэмісцкімі» кліпы гурту «Dymna Lotva», разьмешчаныя на YouTube
• «Сьмерць цалуе ў вочы»,
• «Buried Alive (live at Prophecy fest 2023)»,
• «Адышоўшым (acoustic live at Radio Wnet)»,
• «Перемен! (Кино cover)»,
• «Мяне больш няма (Halloween Live)»,
• «Жывi! (Live!) (Official Music Video)».
Пра гэта паведаміла «Вясна».
Песьня «Адышоўшым» напісаная на верш Валерыя Маракова — паэта, расстралянага 29 кастрычніка 1937 году.