Супрацьпаветраныя сілы Ўкраіны зьбілі 69 бесьпілётнікаў, але 13 ударылі па сямі лякацыях. З раніцы Расея працягвае біць дронамі па ўкраінскіх гарадах.
У Адэскай вобласьці гараць склады, на памежжы — прадпрыемствы і жылы сэктар
Улады Адэскай вобласьці паведамілі, што расейскія войскі атакавалі цывільную інфраструктуру рэгіёну.
«Пачаўся маштабны пажар на плошчы больш за 5 000 м². Агонь ахапіў некалькі складзкіх памяшканьняў, дзе захоўвалася тканіна, адзеньне, пакавальны матэрыял. Папярэдне, адзін чалавек пацярпеў», — паведаміў вобласьці Алег Кіпер.
У горадзе Нежыне Чарнігаўскай вобласьці, як паведамілі ўкраінскія ратаўнікі, ад пападаньня дронаў загарэліся вытворчы цэх і адміністрацыйны корпус мясцовага прадпрыемства. Ніхто не пацярпеў.
У Сумах расейскія войскі пацэлілі побач з шматпавярховымі жылымі дамамі. У кватэрах павыбівала шыбы, у нежылым памяшканьні пачаўся пажар — яго змаглі апэратыўна патушыць.
Зноў пад ударам апынуўся цэнтар Харкава — пацярпеў інтэрнат і 2 цывільныя аўтамабілі. Інфармацыі аб пацярпелых пакуль няма.
У Запароскай вобласьці ў выніку расейскіх абстрэлаў 2 чалавекі загінулі, яшчэ два атрымалі раненьні. Пашкоджаныя прыватныя дамы, гаспадарчыя памяшканьні і аўтамабілі.
У Херсонскай вобласьці пяць чалавек параненыя, у Днепрапятроўскай — два.
ГЛЯДЗІЦЕ ТАКСАМА:
Ва Ўкраіне адрэагавалі на раптоўную праверку войска ў Беларусі: вайсковай актыўнасьці на межах нямаУ анэксаваным Расеяй Крыме гараць нафтабаза і электрападстанцыя
У ноч на 13 кастрычніка нафтабаза ў Феадосіі, што ў акупаваным Расеяй Крыме, зноў пацярпела ад удару бесьпілётнікамі.
«У выніку адбылося ўзгараньне. Пацярпелых, паводле зьвестак на цяпер, няма. Усе профільныя службы працуюць на месцы», — паведаміў падкантрольны Расеі кіраўнік Крыму Сяргей Арсёнаў.
Тым часам Telegram-канал «Крымскі вецер» з спасылкай на сваіх падпісчыкаў адзначыў, што ўдар выклікаў маштабны пажар, бачны за дзясяткі кілямэтраў. На адным участку спынілі рух цягнікоў.
Згодна з інфармацыяй гэтага каналу, пацярпела таксама падстанцыя 330 кВ «Сімферопаль». Людзі ня могуць выехаць на працу ў Сімферопаль, перакрытыя аўтадарогі. Улады мусілі зьмяніць рух прыгараднага аўтобуснага транспарту.
Паводле Міністэрства абароны Расеі, у ноч на 13 кастрычніка над Крымам абясшкодзілі 40 украінскіх бесьпілётнікаў.
Ва Ўкраіне сытуацыю пакуль не камэнтуюць. Мінулая атака на гэтую нафтабазу была 6 кастрычніка.
ГЛЯДЗІЦЕ ТАКСАМА:
Масаваны ўдар дронамі па тэрыторыі Расеі і анэксаваным Крыме: у Феадосіі гарыць нафтабаза; у Белгарадзе перабоі з электрычнасьцюВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.