«Як можна не станоўча ацэньваць тое, што сотні людзей вярнуліся на радзіму. Мы з гуманітарных меркаваньняў перадалі тысячы цел загінуўшых украінскіх салдат, атрымалі ў адказ некалькі дзясяткаў нашых», — сказаў Пуцін. На яго думку, расчараваньні ў перамовах «узьнікаюць ад залішніх чаканьняў».
Прэзыдэнт Украіны Ўладзімір Зяленскі прапанаваў Расеі «перайсьці ад абмену заявамі і сустрэч на тэхнічным узроўні да ўзроўню размовы лідэраў». «Амэрыка гэта прапаноўвала. Украіна гэта падтрымлівала. Патрэбна гатоўнасьць Расеі», — напісаў ён у сваім тэлеграм-канале.
Зяленскі дадаў, што Кіеў падтрымлівае намаганьні Трампа па дасягненьні міру і «чуе заявы з Расеі». «Калі гэта сыгнал аб іх сур’ёзнай гатоўнасьці скончыць вайну годна і ўсталяваць сапраўды працяглы мір, а ня проста спробы выйграць яшчэ час для вайны і адтэрміноўку санкцый, то Ўкраіна яшчэ раз пацьвярджае сваю гатоўнасьць да сустрэчы на ўзроўні лідэраў у любы час», — заявіў украінскі прэзыдэнт.
ГЛЯДЗІЦЕ ТАКСАМА:
Лукашэнка і Пуцін на Валааме згадалі вайну ва Ўкраіне, ультыматум Трампа, дрон, які ўпаў у МенскуПуцін таксама абвінаваціў Украіну ў завышэньні колькасьці дзяцей, вывезеных у Расею. Падчас другога раўнду перамоваў у Стамбуле ўкраінская дэлегацыя перадала расейскай сьпіс украінскіх дзяцей, вывезеных з тэрыторыі Ўкраіны або ўтрымваных у кантраляваных Расеяй рэгіёнах. У сьпісе былі сотні імёнаў.
Раней «Вёрстка» і «Важныя истории» пісалі, што сотні дзяцей, якіх вывезьлі з Данбасу ў Расею, захрасьлі ў расейскай сірочай сыстэме. Журналісты знайшлі ў фэдэральнай сірочай базе 285 анкет такіх дзяцей і пацьвердзілі асобу кожнага дзіцяці.
Прэзыдэнт Расеі таксама ўсьлед за Міністэрствам абароны паведаміў аб узяцьці гораду Часаў Яр Данецкай вобласьці. «Мы ўжо чулі, што гэта не адпавядае рэчаіснасьці — я магу вас запэўніць, што гэта цалкам адпавядае рэчаіснасьці», — сказаў Пуцін.
Прэзыдэнт Украіны Ўладзімір Зяленскі напярэдадні назваў дэзінфармацыяй паведамленьне Мінабароны Расеі аб узяцьці гораду. На мапе ўкраінскага праекту DeepState, які адсочвае зьмены лініі фронту, значная частка тэрыторыі гораду пазначаная як «шэрая зона» без устойлівага кантролю аднаго з бакоў. Частка гораду пад кантролем Расеі.
Акрамя таго, на сустрэчы з Лукашэнкам Пуцін аб’явіў, што ў Расеі вырабілі першы сэрыйны комплекс «Арэшнік» і ўжо паставілі яго ў войскі, а таксама плянуюць перадаць «Арэшнік» у Беларусь. Пацьвярджэньня гэтай інфармацыі няма.
ГЛЯДЗІЦЕ ТАКСАМА:
59 кіляграмаў выбухоўкі? Экспэрты абвяргаюць словы Лукашэнкі пра дрон, які ўпаў у МенскуВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.