У Пэнтагоне ўдакладнілі: Украіна будзе атрымліваць дапамогу ЗША, але інфармаваць аб гэтым ня будуць

Сьпікер Міністэрства абароны ЗША Шон Парнэл. Архіў

Сьпікер Міністэрства абароны ЗША Шон Парнэл заявіў, што вайсковае ведамства пільна аналізуе свае падыходы да ажыцьцяўленьня дапамогі Ўкраіне.

«Міністэрства пільна аналізуе і карэктуе свой падыход, [...], захоўваючы баяздольнасьць арміі ЗША і прыярытэты абароны. Мы ня будзем паведамляць, колькі менавіта зброі і якіх відаў мы перадаём Украіне і калі менавіта гэта адбываецца. Але міністар абароны прадоўжыць даваць прэзыдэнту рэкамэндацыі для ўхваленьня рашэньняў аб далейшай вайсковай дапамозе Ўкраіне», — сказаў Шон Парнэл 2 ліпеня.

У той жа час ён не ўдакладніў, перадачу якой зброі перагледзяць і якіх краін гэта будзе датычыць.

Прадстаўніца Дзяржўнага дэпартамэнту ЗША Тэмі Брус на брыфінгу ў Вашынгтоне таксама заявіла, што ЗША не спынялі пастаўку ўсёй вайсковай дапамогі, а абмежаваньні закранулі толькі некаторыя тыпы ракет.

«Мы не спынялі адпраўку зброі ва Ўкраіну», — сказала Тэмі Брус.

Паводле яе, Міністэрства абароны ХША мае шмат «надзейных варыянтаў» дапамогі Ўкраіне.

ГЛЯДЗІЦЕ ТАКСАМА:

ЗША прыпынілі пастаўкі некаторых узбраеньняў Кіеву

2 ліпеня прэсавая сакратарка Белага дому Анна Келі паведаміла, што Злучаныя Штаты Амэрыкі часткова прыпыняюць пастаўкі зброі, раней абяцанай Украіне для выкарыстаньня ў вайне з Расеяй. Паводле яе, такое рашэньне было ўхваленае пасьля таго, як Пэнтагон выявіў занадта вялікае скарачэньне амэрыканскіх запасаў.

Пасьля гэтай заявы Кіеў запытаў тэлефонныя перамовы з ЗША. Міністэрства абароны Ўкраіны падкрэсьліла, што ўкраінскія ўлады не атрымлівалі афіцыйных паведамленьняў «аб прыпыненьні або пераглядзе графікаў паставак узгодненай абароннай дапамогі».

ГЛЯДЗІЦЕ ТАКСАМА:

Кіеў запытаў перамовы з ЗША пасьля паведамленьняў аб скарачэньні паставак узбраеньняў


Раней амэрыканскія мэдыя з спасылкай на крыніцы паведамілі, што ЗША прыпынілі пастаўкі Ўкраіне шэрагу ўзбраеньняў, у тым ліку дзясяткі ракет для сыстэмаў СПА Patriot. Прычынай сталі засьцярогі што да зьмяншэньня ўласных вайсковых запасаў.

Паводле крыніц Politico і іншых амэрыканскіх мэдыя, могуць быць прыпыненыя пастаўкі:

  • ракет-перахопнікаў для сыстэмаў супрацьпаветранай абароны Patriot,
  • снарадаў для гаўбіц,
  • ракет Hellfire,
  • ракет «паветра-паветра».

Раней стала вядома, што ЗША замест пастаўкі ва Ўкраіну перакінулі каля 20 тысяч зэнітных ракет меншага калібру на Блізкі Ўсход.

Злучаныя Штаты паставілі Ўкраіне зброі і вайсковай дапамогі на больш як 66 мільярдаў даляраў ад пачатку поўнамаштабнага ўварваньня Расеі.