Намесьнік начальніка Галоўнага ўпраўленьня выведкі Міністэрства абароны Ўкраіны Вадзім Скібіцкі заявіў аб зьмяншэньні інтэнсіўнасьці баявых дзеяньняў на лініях фронту.
«Сапраўды, мы фіксуем зьмяншэньне і актыўнасьці баявых дзеяньняў, і найперш баявых сутыкненьняў. Але групоўка іхных войскаў усё роўна застаецца магутнай — гэта больш за 620 тысяч вайскоўцаў Узброеных сіл Расейскай Фэдэрацыі, разьмешчаных на нашых часова акупаваных тэрыторыях, у Курскай вобласьці. Адбываецца перагрупаваньне, ажыцьцяўляецца аднаўленьне баявых стратаў [...], свой уплыў на вядзеньне баявых дзеяньняў непасрэдна мае і надвор’е», — сказаў Вадзім Скібіцкі ў інтэрвію агенцтву РБК-Україна.
Паводле яго, найбольш крытычнымі кірункамі застаецца Данецкая вобласьць — Пакроўск, Краматорск, Славянск і «ўся аглямэрацыя населеных пунктаў, каб у выпадку посьпеху расейцы змаглі прадоўжыць наступальныя дзеяньні, у тым ліку і ў кірунку Днепрапятроўскай вобласьці».
Вадзім Скібіцкі адзначыў, што ўкраінская выведка змагла папярэдзіць некалькі наступальных апэрацый, якія расейскія войскі плянавалі ў канцы 2024-га і ў пачатку 2025 году. Але, паводле яго, выкрыцьцё плянаў суперніка яшчэ не азначае поўную адмову Расеі ад іх рэалізацыі.
«Сёньня асноўная мэта, якую вызначыла Расея на 2025 год — гэта захоп усёй тэрыторыі Данецкай і Луганскай абласьцей, выкананьне задач так званай „спэцыяльнай ваеннай апэрацыі“, утрыманьне кантролю на тымі тэрыторыямі, якія захапілі — Херсонская, Запароская вобласьці і непасрэдна акупаваны Крым», — сказаў прадстаўнік украінскай выведкі.
Паводле яго, у выпадку выхаду Расеі на мяжу Днепрапятроўскай вобласьці павялічыцца пагроза правядзеньня любых штурмавых дзеяньняў, выведкі і зьменшыцца радыюс баявога выкарыстаньня артылерыйскіх і залпавых сыстэм для нанясеньня ўдараў па інфраструктуры Ўкраіны.
«Яны дакладна для сябе вызначылі найбольш крытычныя і актуальныя кірункі вядзеньня баявых дзеяньняў. Найперш гэта пакроўскі кірунак, Тарэцк і Часаў Яр для завяршэньня ўсіх апэрацый, якія яны сплянавалі. Апроч таго, гэта Купянск. Мы ведаем пляны, якія ставіць перад сабой Расея, у тым ліку і магчымасьць правядзеньня штурмавых і наступальных дзеяньняў і ў Херсонскай, і ў Запароскай абласьцях», — паведаміў Вадзім Скібіцкі.