Міністар энэргетыкі Ўкраіны Герман Галушчанка заявіў, што галоўнай мішэньню стала энэргетыка.
«Атакі на энэргааб’екты адбываюцца па ўсёй Украіне. Апэратар сыстэмы перадачы НЭК „Укренерго“ тэрмінова ўвёў экстраныя адключэньні электраэнэргіі», — напісаў Герман Галушчанка на сваёй старонцы ў Facebook.
Без электрычнасьці і вады
Улады Валынскай вобласьці паведамілі, што ў выніку расейскага абстрэлу безь сьвятла засталіся 215 тысяч жыхароў рэгіёну.
«Накіроўвалі ракеты па крытычнай інфраструктуры. На шчасьце, без ахвяр. Ёсьць пашкоджаныя прыватныя гаспадарчыя памяшканьні. [...] Усю важную інфраструктуру, якая засталася без электраэнэргіі, перавялі на генэратары», — адзначаецца ў афіцыйным паведамленьні.
У Ровенскай вобласьці праз ракетную атаку перавялі школы на дыстанцыйную працу. Без энэргіі засталіся больш за 280 тысяч абанэнтаў, ёсьць перабоі з забесьпячэньнем вадой. Улады паведамілі, што людзі ад абстрэлаў не пацярпелі.
На Львоўшчыне безь сьвятла засталіся 523 тысячы абанэнтаў, энэргетычныя аб’екты пацярпелі ў Хмяльніцкай і Івана-Франкоўскай вобласьці.
Ад расейскага абстрэлу пацярпела і ўкраінская сталіца — трывога працягвалася больш за 9 гадзін. Кіеўскія ўлады паведамілі, што Расея атакавала горад крылатымі ракетамі паветранага базаваньня і бесьпілётнікамі рознага тыпу. Аскепкі зьбітых ракет упалі ў двух раёнах сталіцы, пацярпела адно прадпрыемства, інфармацыі аб пацярпелых пакуль не атрымалі.
ГЛЯДЗІЦЕ ТАКСАМА:
Ва Ўкраіне ўзмацніліся баі. Расейскія войскі прасунуліся на фронце, у тыле іх галоўная цэль — інфраструктураНа поўдні ёсьць пацярпелыя, спынены гарадзкі транспарт
Кіраўнік Адэскай абласной дзяржаўнай адміністрацыі Алег Кіпер паведаміў аб пашкоджаньні шасьці прыватных дамоў у рэгіёне і пажары ў гаражным каапэратыве ў Адэсе. Пацярпеў адзін чалавек.
У Мікалаеве спынены ўвесь электрычны грамадзкі транспарт, не працуюць школы. У Херсоне раненьні атрымаў 33-гадовы мужчына, яго шпіталізавалі.
Украінскія ўлады паведамілі, што паводле папярэдняй інфармацыі ў трох абласьцях пяць чалавек загінулі і 19 атрымалі раненьні ў выніку расейскіх абстрэлаў за апошнія содні.
Ракетная атака Расеі на Ўкраіну працягвалася больш за дзьве гадзіны.
ГЛЯДЗІЦЕ ТАКСАМА:
Расея нанесла ўдар па цэнтры Харкава і Адэсы, дзясяткі параненыхРасея атакавала Ўкраіну амаль 200 баявымі сродкамі
У апэратыўным камандаваньні Паветраных сіл Украіны паведамілі, што Расея запусьціла па ўкраінскай тэрыторыі 97 дронаў і 91 ракету.
Сродкі супрацьпаветранай абароны зьбілі 35 бесьпілётнікаў (62 дроны згубіліся лякацыйна ў выніку ўзьдзеньня сродкаў радыёэлектроннай барацьбы) і 79 ракет.
Расея атакавала Ўкраіну ракетамі С-300, крылатымі ракетамі Х-101 і «Калібар» і кіраванымі авіяракетамі Х-59/69.
ГЛЯДЗІЦЕ ТАКСАМА:
Расея атакавала Ўкраіну рэкорднай колькасьцю дронаў і ракет. Зяленскі: у гэтых дронах 16 000 замежных кампанэнтаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.