Вайскоўцы ЗША ня ўдзельнічалі ў ізраільскай апэрацыі ліквідацыі кіраўніка ХАМАС

Ях’я Сінвар, архіўнае фота

У Пэнтагоне заявілі, што амэрыканскія вайскоўцы ня ўдзельнічалі ў ізраільскай апэрацыі, у выніку якой быў забіты лідэр ХАМАС Ях’я Сінвар.

Але амэрыканская выведка ўнесла ўклад у інфармаваньне Ізраіля аб месцазнаходжаньні лідэраў ХАМАС — баявой групоўкі, якая прызнана Злучанымі Штатамі тэрарыстычнай арганізацыяй, піша «Голас Амэрыкі».

«Гэта была ізраільская апэрацыя. Узброеныя Сілы ЗША непасрэдна ня ўдзельнічалі», — заявіў генэрал-маёр ВПС Патрык Райдэр, афіцыйны прадстаўнік Пэнтагону.

«Злучаныя Штаты дапамаглі ў перадачы інфармацыі і выведдадзеных, якія тычацца вызваленьня закладнікаў і адсочваньня лідэраў ХАМАС, якія нясуць адказнасьць за ўтрыманьне закладнікаў. І, вядома, гэта ўвогуле робіць унёсак у разуменьне сытуацыі», — заявіў Райдэр.

«Але, паўтаруся, гэта была ізраільская апэрацыя. Я б рэкамэндаваў вам зьвярнуцца да іх па падрабязнасьці аб тым, як прайшла апэрацыя», — дадаў прадстаўнік Пэнтагону.

Яго камэнтар прагучаў пасьля заявы прэзыдэнта Джо Байдэна пра гібель Сінвара. Прэзыдэнт сказаў, што пасьля нападу ХАМАС на Ізраіль 7 кастрычніка 2023 г. ён загадаў амэрыканскім сілам спэцрэагаваньня і выведслужбам дапамагчы Ізраілю ў пошуку Сінвара і іншых лідэраў баевікоў.

Канфлікт, які працягваецца на Блізкім Усходзе, стаў палітычнай праблемай для адміністрацыі Байдэна напярэдадні выбараў у ЗША 5 лістапада. Камала Гарыс сутыкнулася з моцным ціскам з боку араба-амэрыканскіх, мусульманскіх і лібэральных выбарнікаў за падтрымку адміністрацыяй Байдэна паставак зброі і аказаньня дыпляматычнай дапамогі Ізраілю на фоне канфліктаў у Газе і Лібане.

Атака ХАМАС летась забрала жыцьці 1200 чалавек у Ізраілі і завяршылася захопам больш як 250 закладнікаў, па дадзеных ізраільскіх уладаў.

Ізраільская атака на сэктар Газа, якім кіруе ХАМАС, прывяла да гібелі больш як 42 тысяч чалавек, паводле зьвестак мясцовага Міністэрства аховы здароўя, кантраляванага баевікамі. У Лібане, дзе, як заяўляюць у Ізраілі, ЦАХАЛ атакуе баевікоў «Хэзбалы», якія падтрымліваюцца Іранам, колькасць загінулых перавысіла 2000 чалавек, паводле зьвестак лібанскага ўраду.

Прадстаўнік Дзярждэпартамэнту Мэт’ю Мілер заявіў, што Вашынгтон зараз «падвоіць» свае намаганьні і паспрабуе прасунуць прапанову аб замірэньні і вызваленьні закладнікаў.
Дзяржсакратар Энтані Блінкен ужо абмеркаваў зь міністрамі замежных спраў Катара і Саудаўскай Арабіі пытаньне аб спыненьні вайны і пасьляваенным уладкаваньні Газы, паведаміў Мілер.

«Мы бачым магчымасць, якую хочам выкарыстаць, каб паспрабаваць дамагчыся вызваленьня закладнікаў, — заявіў дарадца Белага дома ў нацыянальнай бясьпецы Джэйк Саліван. — Нам трэба будзе працаваць над тым, каб яго сьмерць сапраўды нанесла ХАМАС той доўгатэрміновы ўдар, якога ўсе мы хочам дабіцца».

ГЛЯДЗІЦЕ ТАКСАМА:

МЗС Ізраіля паведаміў аб сьмерць лідэра ХАМАС Ях'і Сінвара