Раніцай 26 жніўня Расея падняла ў неба 11 стратэгічных бамбавікоў, піша ўкраінская служба Свабоды са спасылкай на Паветраныя сілы Ўкраіны. А тэлеграм-каналы паведамілі пра пускі крылатых ракет «Калібр», імаверна, з акваторыі Чорнага мора. Паводле зьвестак ВМС УС Украіны, там на ўзбраеньні знаходзяцца чатыры расейскія караблі-ракетаносьбіты з агульным залпам да 28 ракет «Калібр».
У выніку масавай атакі Расеі на энэргетычную інфраструктуру пацярпела 15 рэгіёнаў Украіны, заявіў прэм’ер-міністар Украіны Дзяніс Шмыгаль:
«Праціўнік выкарыстоўваў розныя віды ўзбраеньня: БПЛА, крылатыя ракеты, „Кінжалы“. Ёсць параненыя і загінулыя. Шчырыя спачуваньні родным і блізкім», — напісаў Шмыгаль.
Наступствы расейскага абстрэлу Днепрапятроўскай вобласьці Ўкраіны. 26 жніўня 2024
Ён адзначыў, што «мішэньню расейскіх тэрарыстаў стала энэргетычная інфраструктура. Ёсьць пашкоджаньні ў некалькіх рэгіёнах, і „Укренерго“ вымушана выкарыстоўваць аварыйныя адключэнні электраэнэргіі, каб стабілізаваць сыстэму».
«Гэта быў адзін з самых вялікіх удараў — у сукупнасці больш за сотню ракет розных тыпаў і каля сотні „шахедаў“. І, як і большасць папярэдніх расейскіх удараў, гэты такі ж подлы, нацэлены на крытычна важную цывільную інфраструктуру», — заявіў прэзідэнт Украіны Ўладзімір Зяленскі.
Наступствы расейскага ракетнага нападу ў Луцку. 26 жніўня 2024
Польшча пасьля атакі расейцаў на суседзяў падняла ў паветра сваю авіяцыю.
У 7:30 26 жніўня ВПС Украіны паведамілі, што ў паветры знаходзяцца 6 самалётаў Ту-22М3, а ў 9:30 — што з расейскага аэрадрому Савасьлейка падняўсяМіГ-31К. Таксама ў сваім Telegram-канале Вайскова-паветраныя сілы Ўзброеных сілаў Украіны падкрэсьліваюць, што гэта расейскі масавы камбінаваны ракетна-бесьпілётны ўдар па большасьці рэгіёнаў Украіны.
У 9:22 там напісалі, што абстрэл з боку расейскіх ударных БПЛА працягваецца. Атакавалі Палтаву, Цярнопаль і Хмяльніцкі. Паступаюць паведамленьні аб баявых дзеяньнях СПА і выбухах у Кіеўскай, Харкаўскай, Кіраваградзкай, Днепрапятроўскай, Запароскай, Хмяльніцкай, Віньніцкай, Валынскай, Цярнопальскай, Львоўскай і іншых вобласьцях.
Кіраўнік вайсковай абласной адміністрацыі Запароскай вобласьці Іван Фёдараў паведаміў пра гібель аднаго чалавека. Пра яшчэ адну гібель — 69-гадовага мужчыны — напісаў кіраўнік Днепрапятроўскай адміністрацыі Сяргей Лысак.
У Кіеве паранены адзін чалавек і фіксуюцца масавыя адключэньні сьвятла. Частковыя адключэньні адбыліся і на чыгунцы, інфармуе «Укрзалізниця». Парушыўся рух некаторых цягнікоў, украінскія чыгуначнікі ў некаторых выпадках вывелі з дэпо рэзэрвовыя цеплавозы.
Каля Луцку зьбілі «Шахед», ягонымі абломкамі пашкоджаны шматкватэрны будынак. Пра пацярпелых інфармацыі пакуль няма. Таксама на Захадзе Ўкраіны атакаваныя Львоў, Драгобыч і Стрый.
У Палтаўскай вобласьці пашкодзілі прамысловы аб’ект, параненыя 5 чалавек.
Людзей просяць ісьці ў бомбасховішчы, а таксама не фатаграфаваць разбурэньні, каб не даваць агрэсарам інфармацыі пра вынікі абстрэлу.
ГЛЯДЗІЦЕ ТАКСАМА:
Агенцтва Reuters пацьвердзіла гібель свайго супрацоўніка ад удару Расеі па КраматорскуАтака на Саратаў і Энгельс
У той жа момант расейскія ўлады паведамілі пра атаку дронаў на Саратаў.
Раніцай 26 жніўня пры адбіцьці атакі ўкраінскіх бесьпілётнікаў, праўдападобна, на авіябазу ў Энгельсе Саратаўскай вобласьці, адзін зь бесьпілётнікаў упаў на шматпавярховы дом у Саратаве, паведаміў губэрнатар Саратаўскай вобласьці Раман Бусаргін, піша расейская служба Свабоды.
Паводле Бусаргіна, адна жанчына пацярпела і была шпіталізаваная. Астатнім пацярпелым мэдычная дапамога аказваецца на месцы.
Як паведамляе расейскае дзяржаўнае агенцтва «РИА Новости» са спасылкай на Міністэрства аховы здароўя рэгіёну, у Саратаве ў выніку атакі бесьпілётнікаў пацярпелі чатыры чалавекі.
Яшчэ адзін бесьпілётнік пацэліў у дах дому ў Энгельсе, яго абломкі пашкодзілі два дзясяткі аўтамабіляў. У горадзе месьціцца вайсковы аэрадром, які раней ужо атакавала Ўкраіна. Справа ў тым, што там базуюцца цяжкія бамбавікі Ту-95 і Ту-22, якія падымаюцца для ўдараў па Ўкраіне.
Расейскія ўлады заявілі, што агулам за ноч зьбілі 20 дронаў, зь іх 9 над Саратаўскай вобласьцю.
Наступствы падзеньня дрона ў горадзе Энгельс Саратаўскай воласьці. 26 жніўня 2024
ГЛЯДЗІЦЕ ТАКСАМА:
Ва Ўкраіне заявілі, што расейскі дрон перасек мяжу Беларусі пасьля атакі на Чарнігаўскую вобласьцьВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.