Паводле яго слоў, калі гэтыя ўмовы будуць выкананыя, Расея спыніць агонь.
Умовамі магчымай мірнай дамовы ён назваў міжнароднае прызнаньне анэксіі Расеяй Крыму і чатырох абласьцей Украіны, а таксама нэўтральны і бязьядзерны статус Украіны. У працэсе мірнага ўрэгуляваньня краіны Захаду, на думку прэзыдэнта РФ, павінны адмяніць усе санкцыі, уведзеныя супраць Масквы.
Дарадца Офіса прэзыдэнта Ўкраіны Міхаіл Падаляк адрэагаваў на прапановы па ўрэгуляваньні канфлікту, якія агучыў Уладзімір Пуцін.
«Ніякіх новых „мірных прапаноў“ ад Расіі не паступала. Суб’ект Пуцін агучыў толькі „стандартны набор агрэсара“, які ўжо неаднаразова гучаў.
Ягоны зьмест даволі спэцыфічны, у вышэйшай ступені абразьлівы для міжнароднага права і абсалютна красамоўна гаворыць пра няздольнасьць цяперашняга расійскага кіраўніцтва адэкватна ацэньваць рэаліі», — адзначыў Падаляк у сетцы X.
Прапановы Пуціна ў офісе Ўладзіміра Зяленскага бачаць так:
«1. Аддайце нам свае тэрыторыі.
2. Адмоўцеся ад свайго сувэрэнітэту і сваёй субʼектнасьці.
3. Пакіньце сябе без абароны (ніякага сяброўства ў альянсах).
4. Здыміце (разам з краінамі Захаду) усе санкцыі цалкам і неадкладна, каб мы маглі напоўніць нашу ваенізаваную эканоміку і рабіць больш інвэстыцый у інфармацыйныя правакацыі па ўсім сьвеце.
Самае галоўнае — пятае — давайце тэрмінова выпраўляць „не / правал Расеі“ за кошт Украіны».
Паводле Падаляка, у гэтых прапановах няма жаданьня скончыць вайну, але ёсьць жаданьне не плаціць за яе самастойна і весьці яе ў новых фарматах.
«Гэта ўсё поўны падман. Таму — яшчэ раз — пазбаўцеся ад ілюзій і перастаньце ўспрымаць сурʼёзна абразьлівыя для здаровага розуму „прапановы Расеі“», — рэзюмаваў Падаляк.
Ёсьць таксама рэакцыя NATO. Генэральны сакратар альянса Енс Столтэнбэрг у пятніцу адкінуў умовы, высунутыя Пуціным для пачатку мірных перамоваў аб Украіне, назваўшы іх прапановай «большай агрэсіі, большай акупацыі».
«Гэта не прапанова, зробленая добрасумленна», — сказаў Столтэнбэрг журналістам па выніках сустрэчы міністраў абароны NATO ў Брусэлі.
«Гэта прапанова, якая фактычна азначае, што Расея павінна дасягнуць сваіх ваенных мэтаў, чакаючы, што ўкраінцы павінны адмовіцца ад значна большай тэрыторыі, чым Расея змагла заняць да гэтага часу».
Заявы Пуціна прагучалі напярэдадні Ўкраінскага мірнага саміту ў Швайцарыі, у якім возьмуць удзел 90 дзяржаў і арганізацый.
Канфэрэнцыя мае на мэце прыцягнуць падтрымку для «формулы міру» прэзыдэнта Ўкраіны Ўладзіміра Зяленскага.
Паведамлялася, што на саміце разгледзяць тры пункты гэтае формулы: ядзерную бясьпеку, харчовую бясьпеку і гуманітарны кірунак.
Масква, якую на гэтую канфэрэнцыю не запрасілі, заявіла, што мірныя перамовы ва Ўкраіне ня будуць мець сэнсу без удзелу Расеі.
ГЛЯДЗІЦЕ ТАКСАМА:
90 краін і арганізацый пацьвердзілі ўдзел у Саміце міру, — прэзыдэнтка ШвайцарыіГЛЯДЗІЦЕ ТАКСАМА:
Рыхтуючы Саміт міру, украінскія ўлады зрабілі стаўку на эмацыйную дыпляматыю, — Яўген МагдаГЛЯДЗІЦЕ ТАКСАМА:
Reuters: Кітай ня будзе ўдзельнічаць у «саміце міру» па ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.