Пра выпадак паведамілі шэраг расейскіх СМІ.
У запыце Астаніна адзначае, што сярод тэкстаў, паводле якіх прапаноўвалі напісаць сачыненьне на датэрміновым ЕГЭ па расейскай мове 26 сакавіка, быў фрагмэнт твора Алексіевіч «Чарнобыльская малітва». Астаніна абвінаваціла беларускую пісьменьніцу ў «адкрытай русафобіі», заявіўшы, што творы Алексіевіч нібыта «вылучае нянавісьць» да Расеі і так званай «саюзнай дзяржавы». Яна абвінаваціла аўтарку і ў тым, што яна атрымлівала ордэны і ўзнагароды ад дзяржаў – чальцоў NATO падчас вайны супраць Расеі Ўкраіны.
«Расабрнагляд», камэнтуючы сытуацыю, заявіў, што тэксты Алексіевіч не выкарыстоўвалі падчас датэрміновага ЕГЭ па расейскай мове. У ведамстве прызналі, што тэксты пісьменьніцы сапраўды сустракаліся ў матэрыялах ЕГЭ, але «на прыватных трэніровачных рэсурсах да ЕГЭ», за якія «Расабрнагляд» адказнасьць не нясе, заявілі ў ведамстве.
ГЛЯДЗІЦЕ ТАКСАМА: Алексіевіч і яшчэ 38 нобэлеўскіх ляўрэатаў заклікалі сьвет узмацніць барацьбу супраць Пуціна і не прызнаваць яго прэзыдэнтам- Сьвятлана Алексіевіч — беларуская пісьменьніца, ляўрэатка Нобэлеўскай прэміі ў літаратуры за 2015 год. Аўтарка кніг «У вайны не жаночае аблічча», «Цынкавыя хлопчыкі», «Чарнобыльская малітва», «Час сэканд-хэнд» і іншых.
- У Беларусі кнігі Сьвятланы Алексіевіч у 2021 годзе выключылі са школьнай праграмы, а з чэрвеня 2022 году загадалі прыбраць і са школьных бібліятэк Беларусі.
- Сьвятлана Алексіевіч неаднойчы адкрыта выказвалася супраць рэжымаў Пуціна і Лукашэнкі, а таксама супраць вайны Расеі ва Ўкраіне. Так, у адным з апошніх інтэрвію Радыё Свабода Сьвятлана Алексіевіч, сярод іншага, казала, што «Расея стала яшчэ больш жахлівай, яна ідзе да фашызму».