Расея нанесла масіраваны ракетны ўдар па энэргааб’ектах Украіны. ФОТА

Расейскія войскі ў ноч на 22 сакавіка атакавалі Ўкраіну. Паветраныя сілы Ўкраіны паведамлялі пра пускі ўдарных дронаў «Шагед», аэрабалістычных ракет Х-47М2 «Кінжал» і крылатых ракет, піша «Настоящее время».

У апэратыўным камандаваньні Паветраных сіл Украіны паведамілі, што ў ноч на 22 сакавіка Расея атакавала Ўкраіну 88 ракетамі і 63 баявымі дронамі. Сродкі супрацьпаветранай абароны змаглі зьбіць 37 ракет і 55 дронаў.

Расея атакавала 125 населеных пунктаў і 150 аб’ектаў інфраструктуры. Вядома аб сама меней 5 загінулых і 14 параненых. Некалькі людзей зьніклі бязь зьвестак.

Харкаўская вобласьць

Больш за 15 удараў было нанесена па аб’ектах энэргетыкі Харкава, горад фактычна цалкам абясточаны, усе экстраныя службы працуюць, паведаміў кіраўнік абласной адміністрацыі Алег Сінягубаў.

Паводле зьвестак мэра Харкава Ігара Церахава, на месцах некаторых прылётаў пачаліся пажары. Праз адсутнасьць сьвятла на помпавых падстанцыях у горадзе пачаліся праблемы з водазабесьпячэньнем, дадаў ён.

Наступствы ўдару па Харкаву

Запароская вобласьць

Па Запарожжы нанесьлі 12 ракетных удараў, напісаў у сваім тэлеграм-канале кіраўнік абласной адміністрацыі Іван Фёдараў. Паводле папярэдніх зьвестак, разбурана 7 дамоў, яшчэ 35 пашкоджана. Колькасьць пацярпелых удакладняюць.

Наступствы ўдару па Запарожжы

Зьявіліся таксама паведамленьні пра атаку на ДнепраГЭС. Дарадца мэра Марыюпаля Пятро Андрушчанка заявіў, што «расейская ракета пацэліла ў тралейбус, які рухаўся праз дамбу. У тралейбусе былі людзі».

Украінскі «Энэргаатам» заявіў пра адключэньне вонкавай паветранай лініі ВЛ-750кВ «Дняпроўская» ў выніку абстрэлу (яна злучае акупаваную Запароскую АЭС і энэргасыстэму Ўкраіны). Цяпер АЭС злучаная з украінскай энэргасыстэмай толькі лініяй электраперадачы ВЛ-330кВ Запароская ТЭС — Ферасплаўная, адзначылі ў кампаніі.

«На жаль, пацэльваньне ёсьць і па найбуйнейшай ГЭС Украіны — ДнепраГЭС у Запарожжы», — пацьвердзілі ва Укргідраэнэрга. На станцыі пачаўся пажар, аднак пагрозы прарыву няма, паведамілі ў кампаніі.

«Такая сытуацыя вельмі небясьпечная і пагражае аварыйнай сытуацыяй. Калі адключыцца апошняя лінія сувязі з украінскай энэргасеткай, Запароская АЭС апынецца ў чарговым блэкаўце, што зьяўляецца цяжкім парушэньнем умоваў бясьпечнай эксплюатацыі станцыі», — адзначыў кіраўнік «Энэргаатаму» Пятро Коцін.

Днепрапятроўская вобласьць

У Крывым Рогу атакавалі абʼекты крытычнай інфраструктуры.

«Уведзены графікі аварыйных адключэньняў. Лякарні і іншыя абʼекты інфраструктуры, дзе гэта магчыма, пераходзяць на генэратары», — паведаміў старшыня рады абароны гораду Аляксандар Вілкул.

Паводле яго, гэта была камбінаваная атака ракетамі і «Шагедамі».

ГЛЯДЗІЦЕ ТАКСАМА:

Украіна пасьля году перапынку атакавала вайсковы аэрадром у Саратаўскай вобласьці. Што пра гэта вядома

Хмяльніцкая вобласьць

Мэр горада Хмяльніцкі Аляксандар Сімчышын таксама паведаміў пра пашкоджаньні абʼектаў інфраструктуры і жылых дамоў. Паводле яго, ёсьць загінулыя і пацярпелыя сярод цывільных.

Львоўская вобласьць

У Стрыйскім раёне бесьпілётнік пацэліў у абʼект энэргетычнай інфраструктуры, у выніку чаго пачаўся пажар. Інфармацыі пра пацярпелых пакуль няма, напісаў кіраўнік Львоўскай абласной адміністрацыі Максім Казіцкі.

Кіраваградзкая вобласьць

У Крапіўніцкім зьнікла электрычнасьць у шэрагу мікрараёнаў, паведаміла агенцтва УНІАН. У некаторых населеных пунктах электразабесьпячэньне адключылася аварыйна.

«Укренерго»: атака на энэргасыстэму Ўкраіны — найбуйнейшая за ўвесь час вайны

Сёньняшняя атака на энэргасыстэму Ўкраіны — найбуйнейшая за ўвесь час вайны, заявіў кіраўнік «Укренерго» Уладзімір Кудрыцкі. Паводле яго, удары наносіліся па цеплавых і гідраэлектрастанцыях, а таксама па магістральных падстанцыях, якія кіруюцца «Укренерго».

Абмежаваньне электразабесьпячэньня ўвялі ў розных рэгіёнах Украіны, пераважна на левым беразе Дняпра, але гэта «кантраляваныя абмежаваньні», адзначыў Кудрыцкі. Паводле яго, пашкоджаньні энэргетычных аб’ектаў ёсьць ва многіх рэгіёнах, найбольшы маштаб пашкоджаньняў — у Харкаве (горад амаль цалкам застаўся безь сьвятла).

Таксама ён асобна пракамэнтаваў сытуацыю на ДнепраГЭС: «Пакуль няма ніякіх рызык прарыву дамбы, статус пашкоджаньняў удакладняецца і будзе канчаткова зразумелы празь некалькі гадзін».

Міністар энэргетыкі Ўкраіны Герман Галушчанка заявіў, што Расея ажыцьцявіла самую маштабную атаку на ўкраінскую энэргасыстэму за апошні час.

«Мэта ня проста пашкодзіць, а паспрабаваць зноў, як і летась, выклікаць маштабны збой у рабоце энэргасыстэмы краіны. На жаль, ёсьць пападаньні і пашкоджаньні абʼектаў генэрацыі, сыстэмы перадачы і разьмеркаваньня электраэнэргіі ў розных галінах», — адзначыў ён.

У Расеі абстрэлы назвалі «актамі адплаты»

У Міністэрстве абароны Расеі заявілі, што цягам 16-22 сакавіка ў адказ на абстрэлы расейскай тэрыторыі і спробы захапіць расейскія памежныя населеныя пункты, нанесьлі «49 удараў адплаты высокадакладнай зброяй вялікай далёкасьці паветранага базаваньня», у тым ліку аэрабалістычнымі і гіпэргукавымі ракетамі «Кінжал», ракетнымі комплексамі і бесьпілётнікамі.

Расейцы сьцьвярджаюць, што пацэлілі ў «цэнтры ўхваленьня рашэньняў Узброеных сіл Украіны, аб’екты аэрадромнай інфраструктуры, цэхі па рамонце ўзбраеньня і вайсковай тэхнікі, склады захоўваньня дронаў і безэкіпажных катэраў, у базы матэрыяльна-тэхнічнага забесьпячэньня, а таксама пункты часовай дысьлякацыі падразьдзелаў сіл спэцыяльных апэрацый і іншаземных наймітаў».