У выведцы Вялікай Брытаніі назвалі яшчэ адну лінію расейска-ўкраінскага фронту, дзе з пачатку верасьня пачаліся цяжкія баі. Украінскія і расейскія войскі змагаюцца за астравы ў ніжнім цячэньні Дняпра ў Херсонскай вобласьці.
«Абодва бакі распачалі рэйды з камандамі на невялікіх лодках на астравы і супрацьлеглыя берагі ракі», — адзначаецца ў паведамленьні.
Паводле брытанскіх выведнікаў, расейцы актывізавалі свае дзеяньні на гэтым кірунку пасьля таго, як сэктар перайшоў пад кантроль нядаўна створанага 40-га армейскага корпусу.
«Колькасьць задзейнічаных сіл невялікая ў параўнаньні зь іншымі франтамі, аднак абодва бакі лічаць гэты раён стратэгічна важным. Гэта таксама дае [украінскай арміі] магчымасьць адцягнуць падразьдзелы праціўніка ад напружаных баявых дзеяньняў у Запароскай і Данецкай абласьцях», — мяркуюць у вайсковай выведцы Вялікай Брытаніі.
ГЛЯДЗІЦЕ ТАКСАМА:
Белы дом заявіў пра посьпехі ў контранаступе ЎкраіныПрарыў украінцамі лініі абароны пад Бахмутам пагоршыў расейскія пазыцыі і на поўдні
Экспэрты амэрыканскага Інстытуту вывучэньня вайны (ISW) заявілі, што Кляшчэеўка і Андрэеўка пад Бахмутам, якія вярнулі пад кантроль украінскія войскі, былі важнымі элемэнтамі расейскай абарончай лініі Бахмут — Горлаўка, якую ўкраінцы прарвалі. Дзякуючы гэтаму украінскія сілы могуць кантраляваць наземныя лініі сувязі, якія забясьпечваюць расейскую групоўку сіл у раёне Бахмуту.
У ISW пакуль не гатовы назваць вызваленьне Кляшчэеўкі і Андрэеўкі прадвесьнікам больш высокіх тэмпаў прасоўваньня Ўкраіны на поўдзень ад Бахмуту, але зьвяртаюць увагу на тое, што ўкраінскія наступальныя апэрацыі прывялі да разбурэньня важных элемэнтаў расейскай абароны, у тым ліку і ў заходняй частцы Запароскай вобласьці.
ГЛЯДЗІЦЕ ТАКСАМА:
Украіна заявіла пра вызваленьне Кляшчэеўкі каля Бахмута. Экспэрты патлумачылі, чаму гэта важнаРасея ў абстрэлах украінскага тылу аддае перавагу дронам
У ноч на 19 верасьня расейскія войскі запусьцілі з Краснадарскага краю 30 ударных бесьпілётнікаў і адну балістычную ракету «Іскандэр-М» з Крыму па тылавых рэгіёнах Украіны.
Паветраныя сілы Ўкраіны змаглі зьбіць 27 бесьпілётнікаў, але іхныя аскепкі ў розных рэгіёнах краіны выклікалі пажары і разбурэньні. Тры дроны пацэлілі ў прамысловыя склады ў Львове. Адзін чалавек загінуў і яшчэ адзін пацярпеў, яго з траўмамі сярэдняй цяжкасьці шпіталізавалі. Пажар тушаць дагэтуль.
У выніку расейскіх абстрэлаў прыфрантавых населеных пунктаў загінулі два і атрымалі раненьні чатыры жыхары Паўночнага і Аўдзееўкі ў Данецкай вобласьці. У Херсонскай вобласьці загінулі трое цывільных і 11 атрымалі раненьні.
ГЛЯДЗІЦЕ ТАКСАМА:
Расейскія войскі ўначы атакавалі Ўкраіну дронамі-камікадзэ. Украіна паведамляе пра 15 зьбітых дронаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.