Пра гэта гаворыцца ў справаздачы вашынгтонскага Цэнтру стратэгічных і міжнародных дасьледаваньняў.
У той час як агульныя страты танкаў, артылерыйскіх гармат, грузавікоў, бесьпілётнікаў набліжаюцца да 10 тысячаў, асабліва значныя страты расейскае войска панесла ў танках, гаворыцца ў справаздачы. «Па розных ацэнках, Масква страціла ад 1845 да 3511 танкаў на працягу першага году вайны», — адзначаюць аўтары справаздачы, прычым значную долю тых танкаў складаюць мадэрнізаваныя Т-72Б3, якія паступілі на ўзбраеньне ў 2013 годзе. Расейская прамысловасьць ня здольная папоўніць страты пастаўкамі новых танкаў.
Вядучы вытворца танкаў у Расеі, Уралвагонзавод, выпускае 20 танкаў у месяц, у той час як Расея губляе на полі бою ў сярэднім 150 танкаў у месяц. У выніку яна вымушана вяртаць у строй танкі, якія знаходзіліся ў сховішчах дзесяцігодзьдзямі, у тым ліку Т-55, якія паступілі на ўзбраеньне адразу пасьля Другой сусьветнай вайны, — сьцьвярджаецца ў дакладзе.
ГЛЯДЗІЦЕ ТАКСАМА:
Выведка Вялікай Брытаніі: у расейскіх войсках, якія навучаліся ў Беларусі, кепская дысцыпліна і нізкі маральны духРасея таксама страціла доступ да важных камплектуючых — сучасных прыцэлаў, якія імпартаваліся з Францыі. Больш за палову шарыкападшыпнікаў, якія выкарыстоўваюцца ў танках, імпартаваліся з Эўропы і ЗША. Кітайскія і інданэзійскія аналягі, якія застаюцца даступнымі, — ніжэйшай якасьці. Расея мае вялікія цяжкасьці з вытворчасьцю самалётаў, ракет і сродкаў радыёэлектроннай барацьбы з прычыны дэфіцыту паўправаднікоў, экспарт якіх быў забаронены заходнімі краінамі.
Разам з тым Расея дзякуючы запасам усё яшчэ захоўвае значную перавагу над Украінай у баявой тэхніцы. У справаздачы гаворыцца пра перавагу Расеі ў самалётах — у 15 разоў, у танках — у 7–8 разоў, а ў БМП — у 4 разы.
«Санкцыі і экспартны кантроль не зьяўляюцца ідэальным сродкам, які прымусіць Расею завяршыць вайну», — прыходзяць да высновы аўтары справаздачы. Колькасная перавага ў тэхніцы, хутчэй за ўсё, дазволіць Маскве працягваць вайну, разьлічваючы на тое, што Ўкраіна, нягледзячы на значна меншыя страты, у нейкі момант пачне адчуваць сур’ёзны дэфіцыт баявой тэхнікі. Нэўтралізаваць гэтую колькасную перавагу ў тэхніцы можна толькі працягваючы пастаўкі Ўкраіне сучасных заходніх узбраеньняў, гаворыцца ў дакладзе.
- У сераду Белы дом абвясьціў пра выдзяленьне чарговага пакету дапамогі Ўкраіне ў памеры 325 мільёнаў даляраў. У асноўным гэта боепрыпасы.
ГЛЯДЗІЦЕ ТАКСАМА:
ЗША абвясьцілі пра новы пакет вайсковай дапамогі Ўкраіне на $325 мільёнаўГЛЯДЗІЦЕ ТАКСАМА:
Столтэнбэрг у Кіеве заявіў, што паўнапраўнае месца Ўкраіны — у NATO, і запрасіў Зяленскага на саміт у ВільнюВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.