У выведцы NATO заявілі, што расейскія войскі страчваюць у баях за Бахмут у Данецкай вобласьці ў пяць разоў больш, чым Украіна.
Як паведаміла CNN са спасылкай на ананімнага вайсковага прадстаўніка Паўночнаатлянтычнага альянсу, такія суадносіны зьяўляюцца вынікам аналізу атрыманых выведкай зьвестак.
Паводле выведкі, Украіна таксама нясе значныя страты пры абароне гораду.
ГЛЯДЗІЦЕ ТАКСАМА:
Зяленскі пасьля пасяджэньня стаўкі вырашыў, што Ўкраіна працягне абарону БахмутуЦяжкія баі за Бахмут пачаліся ў ліпені 2022 году. Раней прэзыдэнт Украіны Ўладзімір Зяленскі заяўляў, што адстаяць горад важна, але не любой цаной. 6 сакавіка ў Офісе прэзыдэнта Ўкраіны паведамілі, што на пасяджэньні Стаўкі вярхоўнага галоўнакамандуючага ўхвалілі рашэньне аб працягу абароны Бахмута.
ISW: Украіна, зьнішчаючы рэсурсы ПВК «Вагнэр», аслабляе магчымасьці Расеі на іншых кірунках
Экспэрты амэрыканскага Інстытуту вывучэньня вайны (ISW) мяркуюць, што Бахмут не зьяўляецца істотным у апэратыўным ці стратэгічным пляне.
«Захоп Бахмута неабходны, але недастатковы для далейшага прасоўваньня Расеі ў Данецкай вобласьці, і расейскія войскі ўжо панесьлі такія цяжкія страты ў баях за горад, што іх атака, хутчэй за ўсё, завершыцца пасьля таго, як яны захопяць яго, калі не раней. Такім чынам, страта Бахмута не зьяўляецца сур’ёзнай апэратыўнай або стратэгічнай праблемай для Ўкраіны», — адзначаецца ў справаздачы інстытута.
ГЛЯДЗІЦЕ ТАКСАМА:
Пэнтагон: падзеньне Бахмуту ня стала б прыкметай таго, што РФ дамаглася пералому падчас вайныПаводле экспэртаў, бітва Ўкраіны за Бахмут стала стратэгічна важнай празь цяперашні склад расейскіх войскаў, разьмешчаных у гэтым раёне. Найперш, паводле іх, мова аб прыватнай вайсковай кампаніі «Вагнэр», рэзэрвы якой сталі пад Бахмутам «гарматным мясам», а таксама аб элітных войсках, накіраваных у гэты раён.
У Інстытуце вывучэньня вайны мяркуюць, што зьнішчэньне гэтых рэсурсаў — жывой сілы і тэхнікі — істотна абмяжоўвае магчымасьці Расеі на іншых кірунках.
«Бітва за Бахмут можа, па сутнасьці, сурʼёзна пагоршыць лепшыя сілы групоўкі „Вагнэр“, пазбавіўшы Расею некаторых зь яе найбольш эфэктыўных і найбольш цяжкіх для замены ўдарных войскаў. Атакі ПВК „Вагнэр“ ужо аднойчы дасягнулі кульмінацыі, у выніку чаго Міністэрства абароны Расеі перакінула ў бой частку сваіх элітных дэсантных войскаў», — адзначаецца ў справаздачы ISW.
Выведка Вялікай Брытаніі: Расеі для прасоўваньня цяжка падтрымліваць рэсурсы на неабходным узроўні
У выведцы Міністэрства абароны Вялікай Брытаніі мяркуюць, што абарона Бахмута вымотваць сілы і ўкраінскай, і расейскай арміі.
«У мінулыя выходныя ўкраінскія сілы, імаверна, стабілізавалі пэрымэтар сваёй абароны пасьля папярэдняга наступу Расеі на поўнач ад горада. Прыкладна 2 сакавіка расейцы зьнішчылі мост праз адзіную асфальтаваную дарогу ў Бахмут, якая знаходзіцца пад кантролем Украіны. Гразкія ўмовы, імаверна, перашкаджаюць Украіне папаўняць запасы, бо яны вымушаны цяпер выкарыстоўваць грунтовыя дарогі», — адзначылі брытанскія выведнікі.
ГЛЯДЗІЦЕ ТАКСАМА:
У Кіеве дапускаюць «стратэгічнае адступленьне» з Бахмута, дзе ідуць самыя гарачыя баі. ФОТАУ вайсковай выведцы Вялікай Брытаніі таксама мяркуюць, што публічныя рознагалосьсі паміж групоўкай «Вагнэр» і Міністэрствам абароны Расеі аб разьмеркаваньні боепрыпасаў сьведчаць аб тым, што Расеі цяжка падтрымліваць высокі ўзровень асабовага складу і боепрыпасаў, неабходных для прасоўваньня паводле іх цяперашняй тактыцы.
ГЛЯДЗІЦЕ ТАКСАМА:
Як выглядае Марыюпаль праз год пасьля пачатку расейскай блякады. ФОТАВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.