Як паведамляе агенцтва Associated Press, міністар замежных спраў Ізраілю Элі Коэн прыбыў у Кіеў у чацьвер, што стала першым публічным візытам у сталіцу Украіны высокапастаўленага ізраільскага чыноўніка пасьля поўнамаштабнага ўварваньня Расеі ў мінулым годзе.
Сам Элі Коэн прыбыў 16 лютага. Ён так паведаміў пра мэты візыту ў сваім Twitter:
«Я сустрэнуся з прэзыдэнтам Зяленскім і міністрам замежных спраў Кулебам, адкрыю амбасаду Ізраілю ў Кіеве, якая вернецца да пастаяннай і паўнавартаснай дзейнасьці. Наведаю Бучу і Бабін Яр. Я прыйшоў сказаць: Ізраіль падтрымлівае Ўкраіну і ўкраінскі народ у цяжкую хвіліну», — напісаў Коэн.
Візыт Элі Коэна адбываецца якраз напярэдадні першай гадавіны расейскага ўварваньня, калі заходнія краіны імкнуцца павялічыць дапамогу Ўкраіне.
З пачатку поўнамаштабнай вайны Ізраіль вагаўся паміж дапамогай Украіне і пазьбяганьнем канфліктаў з Расеяй, зь якой у яго стратэгічныя рэгіянальныя інтарэсы. У адрозьненьне ад іншых заходніх краін, Ізраіль ня ўводзіў санкцый супраць Расеі ці расейскіх афіцыйных асобаў, не дзяліўся выведнай інфармацыяй і не пастаўляў Украіне зброю. Ён аказваў Украіне гуманітарную падтрымку, у тым ліку прыслаў палявы шпіталь.
У рамках кароткай паездкі Коэн мае сустрэцца з прэзыдэнтам Украіны Ўладзімірам Зяленскім, а таксама з высокапастаўленымі чыноўнікамі Ўкраіны і лідэрамі габрэйскай грамады.
Было незразумела, ці абвесьціць Коэн пра большую дапамогу Ўкраіне падчас свайго візыту, ці гэты візыт азначае большы ўдзел Ізраілю ў будучыні.
«Мы тут з важным візытам у знак салідарнасьці з украінскім народам, які, безумоўна, перажыў вельмі цяжкі час у мінулым годзе», — сказаў Коэн падчас наведваньня мэмарыялу на брацкай магіле ў Бучы, недалёка ад Кіева. Ён сказаў, што Ізраіль падтрымліваў Украіну, аказваў гуманітарную дапамогу і будзе працягваць гэта рабіць.
Раней у гэтым годзе Коэн заявіў, што ўрад прэм’ер-міністра Біньяміна Нэтаньягу «абавязкова зробіць адно: публічна мы будзем менш гаварыць» пра ўварваньне Расеі ва Ўкраіну, але будзе працягваць аказваць Украіне гуманітарную дапамогу. Неўзабаве пасьля ўступленьня на пасаду ён размаўляў зь міністрам замежных спраў Расеі Сяргеем Лаўровым.
Ізраіль падтрымлівае добрыя працоўныя адносіны з абедзьвюма краінамі, якія ваююць між сабой, і мае вялікую колькасьць расійскіх і ўкраінскіх імігрантаў. Ізраіль таксама разьлічвае на каардынацыю бясьпекі з Расеяй у суседняй Сырыі, дзе за апошняе дзесяцігодзьдзе ён нанёс сотні авіяўдараў па іранскіх вайсковых пазыцыях.
У той час як іншыя заходнія краіны нарошчваюць дапамогу Ўкраіне, узмацняецца ціск на Ізраіль, у тым ліку з боку ЗША, каб ён падзяліўся з Украінай некаторымі з сваіх сучасных вайсковых сродкаў.
Дзяржсакратар ЗША Энтані Блінкен заявіў пасьля сустрэчы з Нэтаньягу ў Ерусаліме ў мінулым месяцы, што ён падкрэсьліў «важнасьць забесьпячэньня падтрымкі ўсіх патрэб Украіны — гуманітарных, эканамічных і бясьпекі».
У мінулым годзе былы прэмʼер-міністар Ізраілю Нафталі Бэнэт паспрабаваў ненадоўга пасярэднічаць паміж бакамі, прыляцеўшы ў Маскву неўзабаве пасьля ўварваньня Расеі і сустрэўшыся з прэзыдэнтам Уладзімірам Пуціным. Раней у гэтым месяцы ў інтэрвію Бэнэт сказаў, што Пуцін запэўніў яго ў тым, што Расея не забʼе Зяленскага.
ГЛЯДЗІЦЕ ТАКСАМА:
Экс-прэм’ер Ізраіля заявіў, што прасіў Пуціна не забіваць ЗяленскагаВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.