Пра гэта гаворыцца ў новым тэксьце Інстытуту вывучэньня вайны (ISW). Прадстаўнік Галоўнага выведнага ўпраўленьня Ўкраіны Андрэй Чарняк заявіў, што Расея ня мае рэсурсаў, неабходных для пачатку маштабнай наступальнай апэрацыі 24 лютага, прымеркаванай да гадавіны расейскага ўварваньня ў 2022 годзе. Чарняк адзначыў, што расейцы рыхтуюцца ўзмацніць свае атакі на ўсходзе Ўкраіны ў бліжэйшыя некалькі тыдняў і цяпер шукаюць слабыя месцы ва ўкраінскай абароне.
ISW раней ацаніла, што расейскія войскі вярнулі ініцыятыву на лініі Сватава-Крамянная, але наступ яшчэ не дасягнуў поўнага тэмпу.
Прэс-сакратар Усходняй групоўкі войскаў Украіны палкоўнік Сяргей Чараваты таксама адзначыў, што расейскае кіраўніцтва аддала загад аб захопе адміністрацыйных межаў Луганскай і Данецкай абласьцей, і заявіў, што жорсткія дзеяньні Расеі ў Бахмуце зьяўляюцца «„сымбалем“ няздольнасьці Расеі весьці хуткія дзеяньні пры наступальнай апэрацыі».
ГЛЯДЗІЦЕ ТАКСАМА:
NYT: Расея страціла ва Ўкраіне забітымі і параненымі 200 тысяч вайскоўцаўРасейскія мілітарныя блогеры выглядаюць дэмаралізаванымі праз пэрспэктывы Крамля зьдзейсьніць буйны наступ. Камандуючы з «Данецкай народнай рэспублікі» (ДНР) Аляксандар Хадакоўскі задаўся пытаньнем, чаму расейскія войскі марнуюць свае абмежаваныя рэсурсы на дробныя наступальныя дзеяньні, а не назапашваюць баявыя сілы для правядзеньня больш маштабных наступальных дзеяньняў.
Паведамленьні пра тактычныя няўдачы расейскіх войскаў вакол Вуглядару, Данецкая вобласьць, верагодна, яшчэ больш аслабілі веру расейскай ультранацыяналістычнай супольнасьці ў тое, што расейскія войскі здольныя пачаць рашучую наступальную апэрацыю.
ГЛЯДЗІЦЕ ТАКСАМА:
Расейскае войска паставіла ў акупаваны Такмак «мабільны крэматорый», каб схаваць страты — УСУПаводле назіраньняў ISW, расейскія войскі выкарыстоўваюць больш традыцыйную мэханізаваную тактыку манэўранай вайны са звычайнымі злучэньнямі, а не элітнымі мотастралковымі, марской пяхотай і танкавымі элемэнтамі. Як і прагназавалася, асабовы патэнцыял аднавілі за кошт мабілізацыі. Але расейскія вайскоўцы, відаць, не змаглі падрыхтаваць свой мабілізаваны пэрсанал да вядзеньня эфэктыўных мэханізаваных наступальных апэрацый за кароткі пэрыяд часу з моманту прызыву.
Цяпер Інстытут прагназуе, што расейцы наўрад ці здолеюць выйсьці з раёну Бахмуту на больш шырокі тэатар ваенных дзеяньняў, бо тактыка, якую яны выкарыстоўваюць у Бахмуце, больш пасуе для густанаселеных гарадоў, а сілам нападнікаў не хапае колькасьці элітных фармаваньняў, неабходных для правядзеньня больш буйных баявых дзеяньняў. З гэтага дасьледчыкі робяць выснову, што Расея да новага маштабнага наступу не гатовая.
ГЛЯДЗІЦЕ ТАКСАМА:
Заходнія выведкі: Расеі не хапае ўзбраеньня, але яна паспрабуе наступаць да перадачы замежнай зброі ЎкраінеВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.