Паводле крыніц «Нашай нівы», Аляксандар Лукашэнка нібыта прыняў рашэньне аб правядзеньні схаванай мабілізацыі ў Беларусі для даўкамплектацыі баявых частак, якая будзе ісьці пад выглядам праверкі баяздольнасьці. На першым этапе яна нібыта ня будзе закранаць вялікіх гарадоў, мабілізоўваць будуць найперш сельскае насельніцтва.
«У бліжэйшай пэрспэктыве ніякіх мерапрыемстваў па мабілізацыі не прадбачыцца», заявіў БЕЛТА ваенны камісар Берасьцейскай вобласьці Алег Канавалаў. Ён выступіў з заявай пасьля зьяўленьня інфармацыі аб тайнай мабілізацыі, якая нібыта вядзецца ў краіне.
ГЛЯДЗІЦЕ ТАКСАМА:
«Я б параіла хаваць дзяцей. Хіба мала ў нас закінутых вёсак?». Як беларускія маці рыхтуюцца да магчымай мабілізацыі сыноўСвабода сабрала, што казалі ўлады пра магчымую мабілізацыю ў Беларусі за апошнія месяцы расейскай ваеннай агрэсіі супраць Украіны, якую Беларусь падтрымала, даўшы сваю тэрыторыю, аэрадромы і палігоны для атакі на Ўкраіну, але не паслаўшы сваіх салдатаў на вайну.
Вальфовіч: «Мы і так мабілізаваныя»
Дзяржаўны сакратар Савету бясьпекі Аляксандар Вальфовіч 13 кастрычніка на сустрэчы з работнікамі ААТ «Беларуськалію» паведаміў, што ніякай мабілізацыі ў Беларусі не плянуецца. Гэтая заява стала самай сьвежай з шэрагу выказваньняў беларускага кіраўніцтва на тэму магчымай мабілізацыі, пасьля таго як у Расеі пачалі прызыў рэзэрвістаў на вайну з Украінай.
«Цяпер у нас пачынаецца плянавы восеньскі прызыў. Адпраўляйце сваіх дзяцей, каб яны маральна мацнелі, набраліся досьведу, самастойнасьці, памужнелі. Армія, якая сёньня ў нас існуе, — невялікая, кампактная. Яна адна з самых невялікіх на постсавецкай прасторы ў колькасным складзе. І яна прызначана для таго, каб лякалізаваць тыя ваенныя пагрозы, рызыкі, выклікі, якія сёньня зыходзяць ад нашых, на жаль, суседзяў», — сказаў Аляксандар Вальфовіч.
Ён таксама адзначыў ніякай мабілізацыі ў Беларусі не плянуецца, усе прызыўныя мерапрыемствы плянавыя.
Аляксандар Вальфовіч гаварыў на гэтую тэму і 29 верасьня.
«Мабілізацыя — гэта не пра нас, мы і так мабілізаваныя. І гатовыя даць адпор тымі сіламі і сродкамі, якія для гэтага прызначаныя: тым сілавым блёкам, тым складам мірнага часу, які сёньня выконвае задачы па абароне сваёй краіны», — сказаў Аляксандар Вальфовіч.
Лукашэнка: «Ніякай мабілізацый у Беларусі ня будзе»
23 верасьня, на трэці дзень пасьля абвяшчэньня мабілізацыі ў Расеі, на гэтую тэму выказаўся Аляксандар Лукашэнка. Лукашэнка заявіў тады, што «ніякай мабілізацый у Беларусі ня будзе».
«Гэтая мабілізацыя ў Расеі. Тое, што на нас спрабуюць перакінуць гэты масток, што будзе і ў нас... А калі ня будзе? Гэта вас, прапагандыстаў, перацерлі б. А ім за гэта нічога ня будзе. Ім трэба стварыць сытуацыю. За нешта ўчапіцца. Ня будзе ніякай мабілізацыі. Гэта хлусьня», — цытавала Лукашэнку БелТА.
Мінабароны: можам прызваць 500 тысяч чалавек
Пры гэтым 7 кастрычніка міністар абароны Беларусі Віктар Хрэнін заявіў, што краіна пры неабходнасьці можа выставіць рэсурс у 500 тысяч вайсковабавязаных, паведаміла прэс-служба Мінабароны.
Міністар абароны Беларусі Віктар Хрэнін, каментуючы ход падрыхтоўкі вайскоўцаў запасу Ўзброеных сіл, заявіў, што «мабілізацыйныя зборы з вайскоўцамі запасу носяць пастаянны характар, за апошнія 20 гадоў праз мабілізацыйныя зборы прайшлі 130 тысяч чалавек».
ГЛЯДЗІЦЕ ТАКСАМА:
«Я вельмі спадзяюся, што беларускі народ паступіць правільна». Беларускі расказваюць, што адбываецца ў Кіеве і ЛьвовеГЛЯДЗІЦЕ ТАКСАМА:
Ва Ўкраіне заявілі, што рыхтуюцца да павелічэньня расейскай вайсковай прысутнасьці ў БеларусіВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.