Тэлеграм-канал «Стачком Азота» паведаміў, што на заводзе «Гродна Азот» адбылася надзвычайная сытуацыя, у якой пацярпелі два чалавекі. Паводле непацьверджаных зьвестак каналу, адзін з пацярпелых загінуў, але на прадпрыемстве гэтую інфармацыю абверглі.
Паводле папярэдняй інфармацыі каналу, адбылася «блякіроўка перадкляпанаў на лініі аміяку і выхад прадукту». Пацярпелі працаўнікі, якія дасьледавалі калёну, унутры якой апынуўся аміяк.
Пазьней інфармацыя пра надзвычайнае здарэньне зьявілася ў афіцыйнай газэце «Гродненский химик». Там напісалі пра «двух пацярпелых супрацоўнікаў падраднай арганізацыі, якія без папярэдняга афармленьня дакумэнтаў і ўзгадненьня з кіраўніцтвам цэху аміяк-3, прыступілі да ўстараненьня заўваг па выкананьні дапаможных работ на бягучым рамонце тэхналягічнага аб’екту падразьдзяленьня».
«Гродненский химик» паведамляе, што пацярпелых даставілі ў лякарню хуткай дапамогі і што іх здароўе «знаходзіцца пад строгім кантролем». Пры гэтым пра стан пацярпелых не паведамляецца.
ГЛЯДЗІЦЕ ТАКСАМА: «Мае малыя вырастуць безь мяне». Расказваем пра азотаўцаў, якіх чакае суд у справе «Рабочага руху»