Кіраўнік Мэджлісу крымскататарскага народу, колішні дэпутат Вярхоўнай Рады Ўкраіны Рэфат Чубараў паведаміў, што на тэрыторыі вайсковай часткі каля вёскі Азоўскае Джанкойскага раёну адбыліся выбухі, якія гучалі больш за гадзіну.
«Пацэлілі ў сховішча боепрыпасаў, гукі ад выбухаў далёка пракочваюцца стэпам», — напісаў Рэфат Чубараў на сваёй старонцы ў Facebook.
Паводле яго, кіраўнік расейскай акупацыйнай улады Крыму Сяргей Аксёнаў тэрмінова накіраваўся ў найбліжэйшае да месца здарэньня сяло Майскае.
Мясцовыя СМІ паведамляюць аб вялікім пажары ў тым раёне, зьвязаным нібыта з узгараньнем трансфарматара. Аднак афіцыйных паведамленьняў аб прычынах здарэньня няма.
Крымскія журналісты спасылаюцца на паведамленьні Сяргея Аксёнава, які паведаміў, што абставіны здарэньня высьвятляюцца.
ГЛЯДЗІЦЕ ТАКСАМА:
Улады анэксаванага Крыму пацьвердзілі сэрыю выбухаў на паўвостраве. Ёсьць загінулы і параненыяГэта другое здарэньне ў Крыме за апошнія 10 дзён. Дзявятага жніўня на вайсковым аэрадроме «Сакі», што паблізу пасёлку Навафёдараўка, адбылося, паводле незалежных дасьледчыкаў, больш за дзесяць выбухаў, зьнішчана каля васьмі самалётаў.
Паводле зьвестак, якія абнародаваў Рэфат Чубараў, расейскія акупацыйныя ўлады Крыму пачалі эвакуацыю цывільнага насельніцтва ў радыюсе 5 кілямэтраў ад эпіцэнтру выбухаў. Прадстаўнік крымскататарскага народу сьцьвярджае, што ўжо эвакуавалі больш за 2 тысячы мясцовых жыхароў.
«Можаце ўявіць сабе, якой магутнасьці склад боепрыпасаў заклалі расейскія акупанты ў фэрмах жывёлаагадоўчага комплексу сяла Майскага, якое знаходзіцца паблізу пасёлка Азоўскае Джанкойскага раёну, калі ў выніку выбухаў ужо эвакуавалі больш як 2 тысячы жыхароў».
Паводле яго, боепрыпасы працягваюць дэтанаваць.
ГЛЯДЗІЦЕ ТАКСАМА:
Лідэр крымскіх татараў: выбухі на аэрадроме ў Крыме выклікалі «паніку» сярод тых, хто асеў там пасля анэксііУ Генштабе Ўкраіны адкінулі датычнасьць украінскіх войскаў да выбухаў у Крыме. Міністэрства абароны Расеі заявіла тады, што выбухі адбыліся ў выніку дэтанацыі авіяцыйных боепрыпасаў.
Пазьней крымскія СМІ з спасылкай на прэсавую службу Міністэрства абароны Расеі паведамілі, што «ўзгараньне» на тэрыторыі пляцоўкі часовага захоўваньня боепрыпасаў у вайсковай частцы ў сяле Майскім Джанкойскага раёну.
«На месцы адбылася дэтанацыя боепрыпасаў», — удакладнілі ў Міністэрстве абароны Расеі.
Кіраўнік расейскай акупацыйнай улады Крыму Сяргей Аксёнаў паведаміў, што ад выбухаў загарэліся некалькі жылых будынкаў — яны цалкам згарэлі. Паводле яго, чыгунка ўжо цалкам адноўленая, але пачне працаваць толькі пасьля завяршэньня ўсіх неабходных захадаў бясьпекі.
Па чыгуначным участку, які пашкоджаны ў выніку выбухаў у вайсковай частцы, Расея перавозіла жывую сілу, тэхніку і боепрыпасы на часова акупаваныя тэрыторыі Херсонскай і Запароскай абласьцей.
Новыя выбухі на авіябазе ў Гвардзейскім?
Пакуль Сяргей Аксёнаў знаходзіўся ў Майскім пад Джанкоем, мясцовыя жыхары сталі паведамляць аб выбухах на яшчэ адным аб’екце — вайсковай авіябазе ў пасёлку Гвардзейскае пад Сімфэропалем.
Мясцовыя жыхары пабачылі чорны дым над авіябазай пасьля некалькіх выбухаў. Міністэрства абароны Расеі пакуль гэтага інцыдэнту не камэнтуе.
ГЛЯДЗІЦЕ ТАКСАМА:
Калі праўду не адрозьніш ад хлусьні. Чаму людзі ня вераць афіцыйнай інфармацыі пра выбухі ў Крыме і ЗябраўцыМіністэрства абароны Расеі назвала новую прычыну выбухаў
Празь некалькі гадзін пасьля здарэньня Міністэрства абароны Расеі зьмяніла вэрсію прычын выбухаў з дэтанацыі боепрыпасаў на дывэрсію.
«Раніцай 16 жніўня ў выніку дывэрсіі пацярпеў склад вайсковага прызначэньня ў раёне населенага пункту Джанкой. Шкода нанесена шэрагу цывільных аб’ектаў, сярод якіх ЛЭП, электрастанцыя, чыгунка, а таксама шэраг жылых дамоў. Сур’ёзна пацярпелых няма. Робіцца ўсё неабходнае, каб зьліквідаваць наступствы дывэрсіі», — працытавала паведамленьне Мінабароны Расеі інфармацыйнае агенцтва «Крымінфо».
Украінская выведка пра зброю, якая магла пацярпець
Упраўленьне стратэгічных камунікацый Узброеных сіл Украіны паведаміла, што ў раёне аэрадрому паблізу Джанкоя знаходзілася як мінімум восем зэнітна-ракетных сыстэм С-400, тры — С-300, пяць комплексаў «Панцыр-С1», а таксама 440 транспартна-пускавых кантэйнэраў, якія назапашваліся для адпраўкі ў Херсонскую і Запароскую вобласьць для абстрэлаў Мікалаева і Запарожжа.
У раёне чыгуначнай станцыі «Азоўская» разгружалі 17 баявых браняваных машын, сем артылерыйскіх установак «Мста-С» і тры сыстэмы «Град».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.