«Мы маем усё для аўтаномнай працы — дроны, сонечныя батарэі, генэратар, аўтамабілі, рыштунак і Starlink, — кажуць добраахвотнікі.
На трэнінгу добраахвотнікаў пабываў карэспандэнт Свабоды.
«Матывацыя ў нас адна — барацьба супраць двух рэжымаў»
У падразьдзяленьне аэравыведкі ўвайшлі дзесяць беларусаў. У кожнага свая гісторыя. Нехта нядаўна прыехаў зь Беларусі. Іншыя жылі ў эўрапейскіх краінах. Некаторыя зь іх даўно, а хтосьці знайшоў тут прытулак пасьля рэпрэсій на радзіме.
Падразьдзяленьне аэравыведкі беларусаў трэніруецца перад выездам ва Ўкраіну
Ідэя стварэньня аэравыведкі прыйшла ад малой беларускі Вары, якая больш за год зьбірала на дрон. Калі пачалася вайна, яна аддала свой дрон на карысьць Узброеных сіл Украіны.
Збор сродкаў на аэравыведку арганізавалі Prague Support Team і BySol. З дапамогай спонсараў і неабыякавых людзей удалося сабраць грошы на дроны, рыштунак, Starlink і падрыхтоўку беларусаў. Яны рыхтаваліся ў Чэхіі і Польшчы з дасьведчанымі інструктарамі.
Падразьдзяленьне аэравыведкі беларусаў трэніруецца перад выездам ва Ўкраіну
Днямі беларусы выправяцца ва Ўкраіну. Беларусы будуць далучацца да Інтэрнацыянальнага легіёну ў адной з частак УСУ.
Падразьдзяленьне складаецца з 10 чалавек. Па чатыры чалавекі на аэравыведцы і двое — на забесьпячэньні. Падразьдзяленьне мае некалькі баявых і трэнавальных дронаў.
«У нас розныя гісторыі, але матывацыя адна — баявыя дзеяньні супраць рэжымаў, беларускага і расейскага. У мяне яшчэ адна, асабістая матывацыя: мой тата — украінец, дзед ваяваў у Вялікую Айчынную. І мне зусім не падабаецца, што рэжымы прыпісваюць сабе заслугі майго дзеда», — тлумачыць добраахвотнік Яўген «Сола».
Яўген «Сола»
Ён кажа, што, па сутнасьці, сёньня полк «Пагоня» — гэта аб’яднаньне беларусаў, якія ваююць у розных частках УСУ — у мэдыцынскай эвакуацыі, спэцназе, пяхоце. Цяпер гэта і аэравыведка.
ГЛЯДЗІЦЕ ТАКСАМА:
«Вадзіла дзяцей на могілкі, каб бачылі, якія далей будуць стасункі з татам». Шчыры маналёг удавы загінулага добраахвотніка Васіля Парфянкова«Пакуль мы не пакажам сілу, яны ня будуць нас паважаць»
Камандзір падразьдзяленьня (ён не называе свае зьвесткі ў мэтах бясьпекі. — РС) падзяліўся ягонай матывацый удзелу ў вайне: «Абрыдла жыць пры дыктатуры».
«Раней людзі неяк зьміраліся. Але з кожным годам усё горш, калі за любую рэч чалавек можа сесьці ў турму. Гэта не нармальна. На вонкавым контуры Беларусь — як фашысцкая Італія пры нацысцкай Нямеччыне, з вусатым Мусаліні на чале. Калі мы гэтага ня зьменім, будзем Паўночнай Карэяй. Тыя розныя ва ўладзе і пры ёй, яны разумеюць толькі сілу. Калі мы не пакажам сілу, яны нас ня будуць паважаць», — тлумачыць камандзір.
Падразьдзяленьне аэравыведкі беларусаў трэніруецца перад выездам ва Ўкраіну
Дроны могуць выконваць некалькі задач. Напрыклад, выведваць пазыцыі ворага, каб давесьці інфармацыю да вышэйшага кіраўніцтва, ці да невялікага падразьдзелу, які можа нанесьці удар.
«Калі мы працуем аўтаномна (а ў нас усё для гэтага ёсьць), мы грузім мінамёты, гранатамёты на свае аўтамабілі, пасьля выведкі пазыцый наносім туды ўдар. Для аўтаномнасьці ў нас сонечныя батарэі, вялізныя паўэр-бэнкі, генэратар. Да дрона, у прынцыпе, можна прымацаваць невялікі „груз“ — гранату ВОГ-17 ці ВОГ-25, ці нешта самаробнае — і нанесьці ўдар па праціўніку», — патлумачыў камандзір.
Падразьдзяленьне аэравыведкі беларусаў трэніруецца перад выездам ва Ўкраіну
Падразьдзяленьне аэравыведкі беларусаў трэніруецца перад выездам ва Ўкраіну
ГЛЯДЗІЦЕ ТАКСАМА:
«Іван хацеў стрэліць з гранатамёта ў танк, стаў у поўны рост — і яго адразу расстралялі». Сьведка пра гібель «Брэста» і іншых беларусаўВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.