«Мы ўважліва сочым за сытуацыяй і знаходзімся ў кантакце з украінскімі ўладамі. Зь меркаваньняў канфідэнцыйнасьці ў нас пакуль няма далейшых камэнтароў», — цытуе Прайса тэлеканал CNN.
Раней зьявілася інфармацыя пра тое, што ў палон да расейскіх вайскоўцаў трапілі два грамадзяніны ЗША, якія бралі ўдзел у баявых дзеяньнях ва Ўкраіне на баку ўкраінскіх войскаў. Аб гэтым са спасылкай на свае крыніцы паведаміла брытанскае выданьне The Telegraph.
Выданьне назвала імёны палонных: гэта 39-гадовы Аляксандар Друк і 27-гадовы Эндзі Хʼюн. Паводле The Telegraph, яны служылі добраахвотнікамі ў адным з падразьдзяленьняў войска Ўкраіны. У палон яны нібыта трапілі на мінулым тыдні падчас бою пад Харкавам — аб гэтым выданьню расказалі калегі амэрыканскіх грамадзян.
Цяпер сваякі зьніклых амэрыканскіх вайскоўцаў спрабуюць атрымаць інфармацыю пра іх лёс. Яны зьвязаліся з офісамі сэнатараў і кангрэсмэнаў ад Алабамы, спрабуючы знайсьці інфармацыю аб месцазнаходжаньні мужчын, паведамілі журналісты.
Дзярждэпартамэнт заявіў, што вывучае паведамленьні аб тым, што расейскія або сэпаратысцкія сілы ва Ўкраіне, якія падтрымліваюцца Расеяй, захапілі як мінімум двух амэрыканскіх грамадзян. Калі гэта пацьвердзіцца, яны стануць першымі амэрыканцамі, якія змагаліся за Ўкраіну і былі захопленыя з пачатку вайны.
Тыдзень таму ўлады так званай «ДНР» прысудзілі сьмяротнае пакараньне тром замежным грамадзянам, якія ваявалі на тэрыторыі Данбасу на баку ўкраінскі войскаў і здаліся ў палон: грамадзяніну Марока Саадуну Брагіму і грамадзянам Вялікай Брытаніі Шону Пінэру і Эйдэну Асьліну.
ГЛЯДЗІЦЕ ТАКСАМА:
«Фіктыўны прысуд», — у Вялікай Брытаніі і ЗША пракамэнтавалі сьмяротны вырак у самаабвешчанай «ДНР» брытанскім добраахвотнікамУсе трое служылі ва УСУ па кантракце задоўга да пачатку ўзброенага ўварваньня ва Ўкраіну расейскіх войскаў. У Брагіма Саадуна, па словах ягонага бацькі, было ўкраінскае грамадзянства. Тым ня менш фальшывы суд у «ДНР», які доўжыўся два дні, прызнаў іх вінаватымі ў наёмніцтве і спробе ўзброенага захопу ўлады. Асуджаныя, паводле судовай пастановы, павінныя быць расстраляныя. Яны маюць месяц для падачы скаргаў.
Шэраг эўрапейскіх краін, у тым ліку Вялікая Брытанія, выказалі пратэст у сувязі з прысудам, запатрабаваўшы яго адмены. Кіраўнікі «ДНР» і расейскія афіцыйныя асобы, уключаючы прадстаўніка МЗС Расеі Марыю Захараву, заявілі, што ня бачаць прычын ні для перагляду выраку, ні для наданьня асуджаным статусу ваеннапалонных, а такім чынам — умоў для іх магчымага абмену.
ГЛЯДЗІЦЕ ТАКСАМА:
У «ДНР» прысудзілі сьмяротнае пакараньне замежнікам, што ваявалі за ЎкраінуВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.