Цяпер гэты горад сыстэмна зьнішчаюць расейскія ракеты і бомбы, на яго ўскраінах ідуць баі. Увечары 15 сакавіка стала вядома, што Марыюпаль пачалі абстрэльваць і з мора.
Гуманітарныя грузы не даходзяць
Цягам гэтых двух тыдняў украінскія ўлады намагаюцца арганізаваць гуманітарны калідор, каб у горад увезьці харчы і лекі, а на зваротным шляху эвакуяваць мясцовых жыхароў, якім патрэбна тэрміновая дапамога.
Але гуманітарны груз, адпраўлены некалькі дзён таму, так і не даехаў — кожны дзень ён выпраўляецца зь Бярдзянску, але потым вяртаецца назад, бо дарогу абстрэльваюць расейскія войскі. Адзінае, што дазволілі расейскія войскі, — выехаць жыхарам на сваім аўтатранспарце. Паводле намесьніка кіраўніка Офісу прэзыдэнта Кірыла Цімашэнкі, за апошнія два дні гэтай магчымасьцю скарысталіся каля 20 тысяч асобаў.
Запароская абласная вайсковая адміністрацыя ўдакладніла, што ў ноч на 16 сакавіка ў Запарожжа з Марыюпалю дабраліся 3207 аўтамабіляў. Больш за 3000 грамадзян, у тым ліку 772 дзіцяці, ужо расьсялілі. Кожны атрымаў дапамогу, калі меў патрэбу ў ёй.
ГЛЯДЗІЦЕ ТАКСАМА:
У Марыюпалі афіцыйна вядома пра 2357 загінулых у выніку расейскіх абстрэлаў. Мэрыя мяркуе, што ахвяраў нашмат большКолькасьць ахвяр падлічыць немагчыма
З 2 сакавіка ў горадзе спынілі працу практычна ўсе мясцовыя сродкі інфармацыі. Навіны пэрыядычна публікуе тэлеграм-канал Марыюпальскай гарадзкой рады, дарадца мэра Пятро Андрушчанка і кіраўнік Данецкай абласной вайсковай адміністрацыі Паўло Кірыленка.
Афіцыйна прызнана, што колькасьць ахвяр сярод цывільнага насельніцтва набліжаецца да трох тысяч. Але праўдападобна, што іх істотна больш.
15 сакавіка стала вядома, што расейцы захапілі ў Марыюпалі абласную лякарню інтэнсіўнага лячэньня. Аб гэтым пасьпеў паведаміць уладам адзін з супрацоўнікаў мэдычнай установы.
«Зь лякарні немагчыма выйсьці. Моцна страляюць, сядзім у падвале. Машыны да лякарні ня могуць пад’ехаць ужо двое сутак. Навокал гараць шматпавярховікі... У нашу лякарню расейцы нагналі 400 чалавек з суседніх будынкаў. Выйсьці нам нельга».
Кіраўнік Данецкай абласной вайсковай адміністрацыі Паўло Кірыленка паведаміў, што днямі расейскія войскі практычна зруйнавалі гэтую мэдустанову.
«У асноўным корпусе разбурылі пліты перакрыцьця. Але пэрсанал і пацыенты працягвалі там знаходзіцца ў прыстасаваным падвальным памяшканьні — працаваць і лячыцца. Расейскім нелюдзям мала руйнаваньня, цяпер яны зрабілі з людзей закладнікаў», — кажа Паўло Кірыленка.
Улады цяпер спрабуюць удакладніць інфармацыю аб тым, што расейцы захапілі і іншыя лякарні Марыюпалю.
ГЛЯДЗІЦЕ ТАКСАМА:
Марыюпаль да і пасьля расейскіх абстрэлаў. ФОТА«Мы ня хочам быць героямі і пакутнікамі»
Вайсковыя мэдыкі зьвярнуліся па дапамогу, бо ўжо ня маюць мэдыкамэнтаў, каб ратаваць людзей.
«Кожная бомба, „Град“, руйнаваньні — гэта ня проста раненьні. Гэта адарваныя рукі і ногі, выбітыя вочы, разарваныя аскепкамі целы, выпадзеньне вантробаў... Я разумею, гэта балюча слухаць, бо сярод параненых і загінулых, магчыма, вашы сваякі і блізкія. Але слухайце, бо вы мусіце разумець сытуацыю і дзейнічаць. Нагадваць пра Марыюпаль. Крычаць пра яго! Бо мы ня хочам быць героямі і пакутнікамі пасьмяротна», — кажа лекарка.
«Разблякуйце і закрыйце неба!», — заклікала яна.
ГЛЯДЗІЦЕ ТАКСАМА:
3 мільёны ўцекачоў з Украіны; Пуціна ў ЗША прызналі ваенным злачынцам. 21-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.