У сваёй расейскамоўнай калёнцы на сайце Project-syndicate.org Джордж Сорас піша, што ўварваньню 24 лютага папярэднічала доўгая сустрэча Пуціна і Сі Цзіньпіна, пасьля якой яны апублікавалі старанна падрыхтаваны дакумэнт зь пяці тысяч слоў, у якім абвяшчалася цеснае партнэрства дзьвюх краін. Сорас піша, што гэты дакумэнт мацнейшы за любое пагадненьне і абавязкова патрабуе перад сваім прыняцьцем дэталёвых перамоў.
«Я быў зьдзіўлены, што Сі відавочна даваў Пуціну карт-блянш на ўварваньне і вядзеньне вайны супраць Украіны».
Пры падтрымцы Сі Пуцін дамагаўся мары ўсяго свайго жыцьця зь неверагоднай жорсткасьцю, піша Сорас:
«Пуціну хутка споўніцца 70 гадоў, і ён адчувае, што калі хоча пакінуць сьлед у гісторыі Расеі, ён павінен дзейнічаць цяпер або ніколі. Але ў яго скажонае ўяўленьне пра ролю Расеі ў сьвеце. Зважаючы на ўсё, ён лічыць, што расейскаму народу патрэбны цар, за якім той будзе сьлепа ісьці. Гэта прамая супрацьлегласьць дэмакратычнаму грамадзтву, і гэтая канцэпцыя скажае расейскую „душу, эмацыйную да сэнтымэнтальнасьці“».
Між тым Сі, здаецца, зразумеў, што Пуцін «зламаўся», і 8 сакавіка патэлефанаваў прэзыдэнту Францыі Эманюэлю Макрону і канцлеру Нямеччыны Олафу Шольцу і заявіў, што падтрымлівае іх міратворчыя намаганьні, мяркуе аўтар калёнкі.
Сорас заявіў, што напад Расеі на Ўкраіну 24 лютага стаў пачаткам Трэцяй сусьветнай вайны, «якая патэнцыйна можа зьнішчыць нашу цывілізацыю, і застаецца толькі спадзявацца, што да гэтага часу Пуцін і Сі будуць адхіленыя ад улады».
«Калісьці Пуцін быў хітрым апэратыўнікам КДБ, але, здаецца, ён зьмяніўся за апошні час. Прыдумаўшы сабе ідэю-фікс, ён відавочна страціў сувязь з рэальнасьцю. Ён, несумненна, памыліўся ў ацэнцы сытуацыі ва Ўкраіне. Ён чакаў, што рускамоўныя ўкраінцы будуць сустракаць рускіх салдат з распасьцёртымі абдымкамі, а аказалася, што яны нічым не адрозьніваюцца ад украінскамоўнага насельніцтва. Украінцы арганізавалі неверагодна адважны супраціў відавочна пераважным сілам праціўніка».
«Падзеі 2014 году моцна раззлавалі Пуціна. Аднак расейскае войска дрэнна дзейнічала, калі яму загадалі напасьці на ўкраінскіх братоў. Глыбока ўкаранёная карупцыя пры разьмеркаваньні вайсковых дзяржзамоваў таксама адыграла важную ролю ў гэтых слабых выніках. Але замест таго каб вінаваціць сябе, Пуцін, мяркуючы па ўсім, у літаральным сэнсе звар'яцеў. Ён вырашыў пакараць Украіну за тое, што яна супраціўляецца, і стаў дзейнічаць без аніякіх тармазоў. Ён кінуў у бой усё расейскае войска і ігнаруе любыя правілы вайны, напрыклад, без разбору скідаючы бомбы на цывільнае насельніцтва. Пацярпела мноства бальніц; пашкоджаная энэргасетка, якая забясьпечвае Чарнобыльскую АЭС (цяпер занятую расейскімі войскамі). У аточаным Марыюпалі 400 тысяч чалавек сядзяць без вады і ежы ўжо амаль тыдзень».
Сорас дапускае, што Расея прайграе гэтую вайну: ЗША і Эўразьвяз пастаўляюць Украіне абарончыя віды ўзбраеньняў; робяцца спробы купіць зробленыя ў Расеі зьнішчальнікі МіГ, якімі ўмеюць кіраваць украінскія пілёты.
ГЛЯДЗІЦЕ ТАКСАМА:
Авіянапады на Мікалаеў і Чарнігаў, аблога Марыюпалю, разбураныя харчовыя склады пад Кіевам. 17-ы дзень вайны Расеі супраць УкраіныВайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.