У інтэрвію ВВС пасол адзначыў, што Ўкраіна цяпер знаходзіцца пад пагрозамі і ціскам, і, калі выхадам з гэтай сытуацыі можа быць зьмяненьне стаўленьня да сяброўства ў NATO, яна можа праявіць «гнуткасьць».
Пры гэтым са слоў Прыстайкі вынікае, што сам ён падтрымлівае ўступленьне краіны ў NATO і ня лічыць яго пагрозай для Расеі.
Словы Прыстайкі выклікалі нэгатыўную рэакцыю прэс-сакратара прэзыдэнта Ўкраіны Ўладзіміра Зяленскага. Ён заявіў, што ўступленьне ў ЭЗ і NATO зьяўляецца для Кіева «абсалютным прыярытэтам», і нагадаў, што аб гэтым напісана ў Канстытуцыі краіны.
Неўзабаве пасьля гэтага Прыстайка заявіў ВВС, што Ўкраіна не адмовіцца ад курсу на сяброўства ў NATO, а сам ён меў на ўвазе, што Кіеў можа пайсьці на розныя саступкі, але не ў гэтым пытаньні.
ГЛЯДЗІЦЕ ТАКСАМА:
Расея са спазьненьнем адказала на запыт Украіны, абвінаваціўшы яе ў падрыхтоўцы вайныУ МЗС Украіны таксама адрэагавалі на заяву Прыстайкі і заявілі, што словы аб адмове ад NATO вырваныя з кантэксту.
Пра гэта паведаміў у кам’нтары РБК-Украіна сmпікер МЗС Украіны Алег Нікаленка^
«Словы амбасадара Ўкраіны ў Вялікабрытаніі Вадзіма Прыстайкі аб тым, што Ўкраіна нібыта гатовая разгледзець адмову ад членства ў NATO для прадухіленьня вайны з Расеяй вырваныя з кантэксту», — заявіў ён.
Разам з тым, у МЗС адзначылі, што дзеля міру і захаваньня жыцьцяў грамадзян Украіна гатовая ісьці на любыя фарматы дыялёгаў з краінамі і міжнароднымі арганізацыямі.
ГЛЯДЗІЦЕ ТАКСАМА:
Кіраўніца МЗС Нямеччыны: Эўропа ў небясьпецы, утрымаць Расею спрабуюць па ўсіх каналахСтратэгічная мэта — уступленьне ў NATO і ЭЗ — запісана ва ўкраінскай Канстытуцыі. Згодна з рашэньнем Бухарэсцкага саміту NATO ад 2008 году, Украіна ў будучыні павінна стаць чальцом Паўночнаатлянтычнага саюзу, аднак тэрміны да гэтага часу не названыя.
Пытаньне недапушчэньня сяброўства Ўкраіны ў NATO — адно з ключавых у сьпісе расейскіх патрабаваньняў так званых гарантый бясьпекі. Паўночнаатлянтычны саюз раней адхіліў значную частку гэтых патрабаваньняў, адзначыўшы, што ў Расеі няма права вэта на ўступленьне іншых краінаў у альянс.
Брытанскія СМІ называюць магчымую адмову Ўкраіны ад імкненьня ў NATO «вялікай саступкай» Расеі.
Намесьнік брытанскага міністра абароны ў інтэрвію Reuters адзначыў, што Брытанія пагодзіцца зь любым рашэньнем Украіны ў пытаньні аб сяброўстве ў NATO, паколькі гэта сувэрэннае права Кіева.
- Вадзім Прыстайка — былы міністар замежных спраў Украіны. Яго заявы прагучалі на фоне нарошчваньня Расеяй узброенай групоўкі каля межаў з Украінай. На Захадзе асьцерагаюцца, што Расея можа пачаць уварваньне на ўкраінскую тэрыторыю, каб прымусіць Кіеў пайсьці на саступкі або зусім зьмяніць ва Украіне ўладу.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.