У Польшчы адбылася ўрачыстая цырымонія Grand Press 2021, на якой Анджэя Пачобута прызналі «Журналістам году-2021». Гэта ўжо другое такое прызнаньне для журналіста, папярэдні раз яго ўзнагародзілі гэтай прэміяй у 2011 годзе, паведамляе Radio ZET.
Намесьнік галоўнага рэдактара Gazety Wyborczej Яраслаў Курскі, які атрымаў узнагароду ад імя Пачобута, сказаў, што сытуацыя з журналістам ёсьць «сьведчаньнем таго, што свабода слова ня мае цаны і не падлягае абмеркаваньню».
Таксама сёлета ў жніўні Пачобута завочна ўзнагародзілі ў Польшчы Мэдалём свабоды слова.
ГЛЯДЗІЦЕ ТАКСАМА: Навіны палітвязьняў: Борыс і Пачобуту працягнулі арышт на 3 месяцы, Васілевіч падзякаваў за ляўрэацтва48-гадовы Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі (СПБ). Прыйшоў у журналістыку ў 2002 годзе. Працаваў у першых незалежных горадзенскіх газэтах «Пагоня», «Дзень», «Мясцовы час», газэце «Народная воля», газэце СПБ на польскай мове Głos znad Niemna («Голас з-над Нёмана»). Быў рэдактарам часопіса СПБ Magazyn Polski na uchodźstwie, карэспандэнтам выданьня Gazeta Wyborcza. Займаўся тэмамі, зьвязанымі зь гісторыяй спэцслужбаў СССР, антысавецкага супраціву ў Заходняй Беларусі, Арміі Краёвай.
Сёлета 25 сакавіка да Пачобута прыйшлі зь ператрусам і затрымалі. Цяпер ён знаходзіцца ў Жодзінскай турме. Таксама ў сакавіку затрымалі яшчэ трох актывістак польскай дыяспары і старшыню арганізацыі Анжаліку Борыс. Ім закідаюць «распальваньне нацыянальнай варожасьці» і «рэабілітацыю нацызму».
Пазьней стала вядома, што Анджэй Пачобут і Анжаліка Борыс адмовіліся ад вызваленьня ў абмен на згоду пакінуць радзіму. У той жа час іншыя актывісткі — Ірэна Бярнацкая, Марыя Цішкоўская і Ганна Панішава — гэтай магчымасьцю скарысталіся, іх без дакумэнтаў, у парушэньне ўсіх правілаў, вывезьлі ў Польшчу.
ГЛЯДЗІЦЕ ТАКСАМА: Зьняволеная рэдактарка Tut.by Золатава атрымала ўзнагароду Reporter:innen-Preis 2021 ГЛЯДЗІЦЕ ТАКСАМА: Палітвязьня Вітольда Ашурка пасьмяротна ўганаравалі ўкраінскім крыжом «За годнасьць у палоне»