Злучаныя Штаты выканаюць сваё абяцаньне скараціць выкіды парніковых газаў на 50-52% да 2030 года ў параўнаньні з узроўнем 2005 года, заявіў у панядзелак прэзыдэнт ЗША Джо Байдэн, зьвяртаючыся да сусьветных лідэраў на канфэрэнцыі ў шатляндзкім Глазга. Ён таксама падкрэсьліў, што сусьветная супольнасьць павінная аказваць больш актыўную дапамогу краінам разьвіцьця, у сфэры барацьбы з кліматычнымі зьменамі.
Выступаючы на саміце, Байдэн прынёс прабачэньні за рашэньне аб выхадзе ЗША з Парыскага пагадненьня па клімаце, некалі прынятае Дональдам Трампам — папярэднікам Байдэна на пасадзе прэзыдэнта.
«Мяркую, што я не павінен прасіць прабачэньня, але я прыношу прабачэньні за той факт, што пры папярэдняй адміністрацыі ЗША выйшлі з Парыскага пагадненьня», — сказаў прэзыдэнт Злучаных Штатаў.
ГЛЯДЗІЦЕ ТАКСАМА: Лідэры G20 перашкодзяць вялікаму бізнэсу хаваць падаткі«Таму мая адміністрацыя працуе звышурочна, каб прадэманстраваць, што нашыя абавязацельствы ў сфэры клімату — гэта справы, а не словы», — працягваў Байдэн.
Больш за 100 сусьветных лідэраў у панядзелак сабраліся ў Глазга, дзе адкрылася двухтыднёвая канфэрэнцыя ААН па клімаце.
Прэм’ер-міністар Вялікай Брытаніі Борыс Джонсан, які выступае ў якасьці прымаючага боку саміту, падкрэсьліў што трэба дзейнічаць неадкладна, дадаўшы, што чалавецтва марудзіла занадта доўга.
«Калі сёньня мы не возьмемся сурʼёзна за барацьбу са зьмяненьнем клімату, заўтра, калі прыйдзе чарга нашых дзяцей, будзе ўжо занадта позна», — заявіў брытанскі лідэр.
ГЛЯДЗІЦЕ ТАКСАМА: У наступным інтэлектуальным клюбе Алексіевіч — Снайдэр і Портнікаў пра шлях да няволіНапярэдадні, выступаючы на прэсавай канфэрэнцыі ў Італіі, прэзыдэнт ЗША Байдэн раскрытыкаваў Расею і Кітай за тое, што гэтыя краіны, паводле яго слоў, практычна не праявілі сябе ў рэалізацыі якіх бы то ні было абавязаньняў па барацьбе з глябальным пацяпленьнем.
«Існаваньне пудынгу даказваецца ў працэсе ежы», — прывёў амэрыканскі прэзыдэнт словы старой прыказкі.
«І гэта, — працягваў ён, — запатрабуе ад нас і ў далейшым быць засяроджанымі на тым, чаго не робіць Кітай, чаго не робіць Расея, чаго не робіць Саудаўская Аравія».
ГЛЯДЗІЦЕ ТАКСАМА: BBC: Краіны спрабуюць зьмяніць справаздачу ААН аб барацьбе са зьменай кліматуКліматычная канфэрэнцыя праходзіць пасьля саміту «Вялікай дваццаткі» у Рыме, дзе лідэры вядучых эканомік сьвету дамовіліся працаваць над дасягненьнем вугляроднай нэўтральнасьці «прыкладна да сярэдзіны стагодзьдзя».
На краіны «Вялікай дваццаткі» прыпадае больш за тры чвэрці ад агульнага абʼёму выкідаў парніковых газаў у сьвеце.