19 жніўня на свабоду выйшлі чатыры фігуранты справы «Прэс-клюбу»: Юлія Слуцкая, Ала Шарко, Сяргей Альшэўскі і Пётра Слуцкі. «Прэс-клюб» паведаміў, што яны выйшлі на волю ў выніку памілаваньня. Пры гэтым ў справе яшчэ не было прысудаў. За кратамі яшчэ застаюцца экс-супрацоўнікі БТ Ксенія Луцкіна і Дзяніс Сакалоўскі.
АПОШНЯЕ: Юлія Слуцкая: «Наша памілаваньне не зьвязана з праграмай Васкрасенскага»Пацікавіліся думкамі юрыстаў Сяргея Зікрацкага і Паўла Сапелкі.
«Адна з умоваў вызваленьня — пагашэньне стратаў у кратным памеры»
Павал Сапелка
Юрыст пазбаўленага рэгістрацыі праваабарончага цэнтру «Вясна» Павал Сапелка кажа, што ня можа камэнтаваць рашэньне, ня бачыўшы дакумэнтаў.
«Аднак ва ўказе Лукашэнкі ад 26 сакавіка 2021 году № 122 зьменены стары парадак, зьмяшчаецца Палажэньне аб парадку ажыцьцяўленьня ў Рэспубліцы Беларусь памілаваньня асуджаных.
Акрамя памілаваньня, прадугледжваецца „вызваленьне ад крымінальнай адказнасьці асобаў, якія спрыялі раскрыцьцю і прадухіленьню наступстваў зьдзяйсьненьня злачынстваў“.
Там прыкладна такі ж парадак, што і пры памілаваньні: адна з умоваў — пагашэньне стратаў у кратным памеры.
Так, і раней вызвалялі ад адказнасьці ў працэсе расьсьледаваньня многіх. Калі ва ўчорашнім выпадку мелася на ўвазе менавіта памілаваньне — тады трэба думаць далей. Але найперш трэба вывучыць дакумэнты», — тлумачыць юрыст праваабарончага цэнтру «Вясна» Павал Сапелка.
На пытаньне, што будзе зь яшчэ дваімі фігурантамі справы «Прэс-клюбу», Ксеніяй Луцкінай і Дзянісам Сакалоўскім, якія, паводле папярэдняй інфармацыі, не пісалі прашэньня аб памілаваньні, Павал Сапелка адказаў так:
«У Палажэньні прапісана: ня хочаш вызваленьня ў парадку памілаваньня — скончаць сьледзтва і накіруюць справу ў суд».
Павал Сапелка дадае, што можна напісаць прашэньне аб памілаваньні, а ўлады адмовяць.
«Пытаньне ж яшчэ ў суме, маўляў, нейкую шкоду ў шматразовым памеры можна і не пацягнуць», — мяркуе юрыст.
Вядома, што 6 студзеня сваякі фігурантаў справы «Прэс-клюбу» пералічылі на рахунак Сьледчага камітэту 110 тысяч рублёў.
ГЛЯДЗІЦЕ ТАКСАМА: Сваякі затрыманых супрацоўнікаў «Прэс-клюбу» пералічылі СК 110 тысяч рублёў
«Мы ня маем права супакойвацца, пакуль ня выйдзе на свабоду апошні чалавек, які за кратамі з палітычных матываў»
Юрыст Сяргей Зікрацкі, якога пазбавілі адвакацкай ліцэнзіі і які цяпер працуе ў камандзе Сьвятланы Ціханоўскай, напісаў на сваёй старонцы ў фэйсбуку, што ў адпаведнасьці з артыкулам 96 Крымінальнага кодэксу памілаваньне ўжываецца да асобы, асуджанай за злачынства.
«Ніхто з тых, хто выйшаў учора зь СІЗА, ня быў асуджаны. Улады спачатку парушаюць закон, калі кідаюць людзей за краты, а потым зноў парушаюць яго, каб адпусьціць іх...
Другое. На раніцу 20 жніўня за кратамі застаюцца яшчэ 633 палітычныя зьняволеныя і тысячы людзей, не прызнаныя палітвязьнямі, але якія сядзяць з палітычных матываў. Мы павінны радавацца закладніку, які выходзіць на волю, але мы ня маем права супакойвацца і задавальняцца, пакуль ня выйдзе на свабоду апошні чалавек, які знаходзіцца за кратамі з палітычных матываў», — напісаў Сяргей Зікрацкі.
ГЛЯДЗІЦЕ ТАКСАМА: «Тое, што адбылося, незаконна». Юрыст пра «памілаваньне» неасуджаных супрацоўнікаў «Прэс-клюбу» ГЛЯДЗІЦЕ ТАКСАМА: Хто такія Ксенія Луцкіна і Дзяніс Сакалоўскі, што засталіся за кратамі пасьля вызваленьня супрацоўнікаў «Прэс-клюбу»