У сувязі з выхадам у адстаўку вызвалены ад пасадаў сталы прадстаўнік Беларусі пры ЭЗ, NATO і Эўрапейскай супольнасьці па атамнай энэргіі, амбасадар у Бэльгіі і Люксэмбургу (па сумяшчальніцтве) Аляксандар Міхневіч. Адпаведны ўказ 29 ліпеня падпісаў Аляксандар Лукашэнка, паведаміла ягоная прэс-служба.
У сувязі з новым абвастрэньнем адносінаў паміж Беларусьсю і ЭЗ у канцы чэрвеня гэтага году Міхневіч быў адкліканы ў Менск для кансультацыяў.
- 67-гадовы Аляксандар Міхневіч — сын міністра культуры (1971–1988) Юрыя Міхневіча. У 2000–2006 гадах — намесьнік міністра замежных спраў Беларусі, у 2006–2012 гадах — пасол у Вялікай Брытаніі і Паўночнай Ірляндыі, у Ірляндыі па сумяшчальніцтве, у 2012–2016 гадах — першы намесьнік міністра замежных спраў. 13 чэрвеня 2016 году быў прызначаны паслом у Бэльгіі і Люксэмбургу па сумяшчальніцтве, пастаянным прадстаўніком пры ЭЗ і NATO.