Вярхоўны камісар ААН у правах чалавека Мішэль Бачэлет выказала глыбокую трывогу з нагоды падзеяў у Беларусі, дзе сілавікі правялі дзясяткі ператрусаў у офісах і дамах актывістаў-праваабаронцаў і журналістаў.
ГЛЯДЗІЦЕ ТАКСАМА: Жузэп Бурэль: Эўразьвяз гатовы разгледзець далейшыя абмежавальныя захады адносна БеларусіУ распаўсюджанай у чацьвер, 15 ліпеня, у Жэнэве заяве Бачэлет расцаніла такія дзеяньні як недапушчальныя рэпрэсіі.
«Я глыбока занепакоеная апошнімі падзеямі ў Беларусі, дзе ў сераду сілы бясьпекі распачалі дзясяткі рэйдаў у офісы і дамы актывістаў-праваабаронцаў і журналістаў, і шэраг людзей, як паведамляецца, затрымалі, — гаворыцца ў заяве. — Падобныя рэпрэсіі зьяўляюцца абсалютна недапушчальнымі».
Паводле вярхоўнага камісара ААН, падзеі серады «зноў сьведчаць пра абуральную пагарду беларускіх уладаў да сваіх абавязаньняў у адпаведнасьці зь міжнародным заканадаўствам у сфэры правоў чалавека».
ГЛЯДЗІЦЕ ТАКСАМА: Прадстаўнікі Эўразьвязу і Дзярждэпартамэнту ЗША асудзілі атаку на НДА ў БеларусіБачэлет нагадала аб сваіх неаднаразовых папярэджаньнях з нагоды «пагаршэньня сытуацыі ў Беларусі», заклікаўшы Менск «спыніць палітыку запалохваньня і перасьледу грамадзянскай супольнасьці і супрацоўнікаў СМІ». «Тыя, хто ўсё яшчэ затрыманыя, мусяць быць неадкладна вызваленыя», — запатрабавала Бачэлет.
У сераду і чацьвер беларускія сілавікі правялі ператрусы ў многіх праваабарончых арганізацыях, сярод якіх, у прыватнасьці, цэнтар «Вясна», Беларуская асацыяцыя журналістаў, Згуртаваньне беларусаў свету «Бацькаўшчына», аб’яднаньне «Гавары праўду», «Грамадзянскі форум». Некалькі вядомых праваабаронцаў затрымалі.
ГЛЯДЗІЦЕ ТАКСАМА: Праваабарончыя арганізацыі Ўкраіны патрабуюць ад ураду разарваць усе дачыненьні з Лукашэнкам