У Беларусі дэпэрсаналізуюць зьвесткі пра пацыентаў

Пацыент на прыёме, ілюстрацыйнае фота

Міністэрства здароўя Беларусі распрацавала плятформу аб парадку дэпэрсаналізацыі дадзеных пацыентаў.

Пра гэта гаворыцца ў афіцыйным паведамленьні, апублікаваным 8 ліпеня на сайце ведамства.

«У Беларусі распрацоўваецца праграмная плятформа цэнтралізаванай інфармацыйнай сыстэмы аховы здароўя, адна з задач якой — збор і захоўваньне інфармацыі аб стане здароўя пацыентаў», — адзначае Міністэрства аховы здароўя.

ГЛЯДЗІЦЕ ТАКСАМА: «Усё, што робіцца цяпер, катастрофай адгукнецца ў будучыні», — знаныя лекары пра арышты і ад’езд дактароў

Асноўны элемэнт праграмы — электронная мэдычная карта пацыента, якая будзе ўключаць прозьвішча, імя, імя па бацьку, пашпартныя зьвесткі, інфармацыю аб месцы жыхарства, працы, кантактныя нумары тэлефонаў.

Паводле ведамства, для таго, каб захаваць канфыдэнцыйнасьць, пацыентаў дэпэрсаналізуюць шляхам увядзеньня ідэнтыфікатараў і дэкампазыцыі.

Дакумэнт набудзе моц 23 ліпеня. Зь якой прычыны плянуюцца новаўвядзеньні, не паведамляецца.

ГЛЯДЗІЦЕ ТАКСАМА: Па факце гібелі Рамана Бандарэнкі завялі крымінальную справу, праз 100 дзён пасьля сьмерці

Раней журналістку парталу Tut.by Кацярыну Барысевіч і лекара Арцёма Сарокіна абвінавацілі ў «выдаваньні мэдычнай тайны, што прывяло да цяжкіх наступстваў» (ч. 3 арт. 178 КК).

Нагодай стаў апублікаваны 13 лістапада артыкул, у якім гаварылася, што ў крыві Рамана Бандарэнкі, забітага ў Менску на так званай «плошчы Пераменаў», не было алькаголю. Да таго Лукашэнка публічна казаў, што Раман Бандарэнка быў п’яны.

Родныя Бандарэнкі да журналісткі і доктара ня мелі ніякіх прэтэнзій.

ГЛЯДЗІЦЕ ТАКСАМА: Сястра Рамана Бандарэнкі: «Я асабіста дазволіла Барысевіч апублікаваць вынікі яго аналізаў». ВІДЭА

2 сакавіка Кацярыне Барысевіч прысудзілі 6 месяцаў пазбаўленьня волі. Прысуд абскардзіла пракуратура, але беспасьпяхова.

Лекара Арцёма Сарокіна асудзілі на два гады калёніі з адтэрміноўкай на адзін год.