19 чэрвеня на тэрыторыі Тварачускага староства ў Ігналінскім раёне Літвы памежнікі гэтай краіны затрымалі 12 чалавек, якія перасеклі мяжу з боку Беларусі. З сабой у затрыманых не было ніякіх дакумэнтаў, яны назваліся грамадзянамі Іраку, інфармуе памежная служба Літвы.
Зараз замежнікі знаходзяцца на карантыне, у іх узялі тэсты на COVID-19. Асобы людзей высьвятляюць, з нагоды іх пераходу мяжы цяпер вядзецца разьбіральніцтва.
За апошнія два тыдні супрацоўнікі памежнай службы Літвы затрымалі ў адным Ігналінскім раёне 118 чалавек. Усяго ў Літву сёлета спрабавалі трапіць 419 нелегальных мігрантаў. Большасьць зь іх — грамадзяне Іраку, што ў пяць разоў больш, чым за ўвесь 2020 год.
У Літве ўзмацнілі ахову мяжы зь Беларусьсю. Сюды былі накіраваныя памежнікі зь іншых дэпартамэнтаў краіны, а таксама прадстаўнікі мясцовай Службы грамадзкай бясьпекі і іншых сілавых структур краіны.
Раней улады Літвы абвінавацілі афіцыйны Менск у спрыяньні нелегальнай міграцыі.
ГЛЯДЗІЦЕ ТАКСАМА: Прэм’ер-міністар Літвы абмеркавала ў Латвіі нелегальную міграцыю зь Беларусі ГЛЯДЗІЦЕ ТАКСАМА: У Польшчы затрымалі адразу дзьве групы нелегальных мігрантаў зь Беларусі ГЛЯДЗІЦЕ ТАКСАМА: Колькасьць сёлетніх нелегальных мігрантаў зь Беларусі ў Літву перавысіла 400 чалавек