«Мы асабліва занепакоеныя (...) нелегальнай міграцыяй празь мяжу зь Літвой, арганізаванай зь ведама або нават з дапамогай рэжыму. Калі беларускі рэжым выкарыстоўвае нелегальных мігрантаў як зброю і сродак ціску на ЭЗ, гэта парушэньне ня толькі міжнародных нормаў, але і асноўных прынцыпаў гуманізму», — заявіла Шыманіце.
Кіраўнік ураду Літвы падзякавала свайму латвійскаму калегу Крышʼянісу Карыньшу за хуткую рэакцыю ягонай краіны на «згон грамадзянскага самалёта беларускім рэжымам».
«Толькі адзіная пазыцыя дэмакратычнай міжнароднай супольнасьці і пасьлядоўны ціск могуць даць выразны сыгнал рэжыму, што няма іншага шляху, акрамя як пакласьці канец рэпрэсіям супраць уласных грамадзян і нападкам на ЭЗ», — лічыць Шыманіце. Яна выказала заклапочанасьць катаваньнямі і павелічэньнем колькасьці палітвязьняў у Беларусі.
Прэмʼер-міністр Літвы адзначыла важнасьць адзінага падыходу дзьвюх краін да Беларускай АЭС:
«Астравецкая АЭС небясьпечная, і электраэнэргія, якая вырабляецца на ёй, не павiнна паступаць на рынак ЭЗ. Для мяне важна пераканацца, што ў нас няма розных палітычных пазыцый. А тэхнічныя пытаньні ў найбліжэйшы час абмяркуюць энэргетыкі».
ЭЗ павінен быць гатовы падтрымаць умацаваньне сваёй зьнешняй мяжы з Беларусьсю, гэта важна ня толькі для бясьпекі рэгіёну, але і для ўсяго ЭЗ, заявіла сьпікер Сэйму Латвіі Інара Мурніеце на сустрэчы з Шыманіце.
Па словах Мурніеце, эканамічныя санкцыі ЭЗ супраць Беларусі павінны быць уведзеныя як мага хутчэй, у той жа час неабходна падтрымліваць права людзей свабодна выказваць свае погляды, а таксама працягваць дапамогу беларускай грамадзянскай супольнасьці, падкрэсьліла яна.
11 чэрвеня ў Вене на сустрэчы з канцлерам Аўстрыі Сэбастыянам Курцам Інгрыда Шыманіце заявіла, што паток нелегальных мігрантаў зь Беларусі ў Літву дасягнуў гістарычнага максымуму.
Па словах Шыманіце, беларускі рэжым нядаўна паабяцаў напоўніць Эўропу нелегаламі.
- БелаПАН нагадвае, што 26 траўня ў беларускіх праўладных телеграм-каналах зьявіліся паведамленьні, як сьцьвярджаецца, з асобнымі заявамі Аляксандра Лукашэнкі на сустрэчы з дэпутатамі абедзьвюх палатаў Нацыянальнага сходу, членамі канстытуцыйнай камісіі і прадстаўнікамі органаў дзяржкіраваньня. У прыватнасьці было апублікавана паведамленьне зь ягонай рэакцыяй на дзеяньні Захаду: «Лукашэнка: мы спынялі наркотыкі і мігрантаў — цяпер будзеце самі іх есьці і лавіць».
- Гэтыя паведамленьні былі перадрукаваныя ў телеграм-канале аднаго з дзяржаўных тэлеканалаў. Са спасылкай на яго адпаведныя навіны апублікавалі некаторыя расейскія і ўкраінскія СМІ. Прэс-служба Лукашэнкі ў расшыфроўцы выступу на ягоным сайце такіх заяў не прыводзіла. Не было іх і ў паведамленьнях дзяржаўных СМІ.
- На гэтым жа мерапрыемстве міністар замежных спраў Уладзімер Макей паведаміў: «Мы вымушаныя і будзем жорстка рэагаваць на любыя недружалюбныя крокі ў наш адрас. Мы разглядаем магчымасьць прыпыненьня ўзаемадзеяньня з ЭЗ па пытаньнях барацьбы з нелегальнай міграцыяй, аргзлачыннасьцю, забесьпячэньня ядзернай бясьпекі».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў