Польскі ўрад падпісаў распараджэньне, згодна зь якім правам выдачы візаў надзяляецца міністар замежных спраў Польшчы. Заявы на атрыманьне візы ад беларусаў будуць прымаць у МЗС у Варшаве, інфармуе «Белсат».
Дакумэнт набывае моц 14 чэрвеня 2021 году.
Дагэтуль візавымі пытаньнямі займаліся консулы. Цяпер беларусы змогуць атрымаць візу, зьвярнуўшыся ў адмысловы аддзел у Міністэрстве замежных спраў Польшчы. Мяркуецца, што працэдура павінна стаць зручнейшай і хутчэйшай.
Беларусь — адзіная краіна, грамадзянам якой Польшча такім чынам спрасьціла атрыманьне візаў. У МЗС можна будзе зьвяртацца ў тым ліку па працоўную і турыстычную візы. Як будзе выглядаць уся працэдура і якімі будуць тэрміны, пакуль дакладна ня вызначана.
Раней намесьнік міністра замежных спраў Польшчы Марцін Пшыдач заявіў, што Польшча і Літва выдалі каля 80% усіх візаў беларусам, каб «беларусы адчулі, што ў іх ёсьць пэрспэктыва і пераканаліся ў тым, як паводзіць сябе іх дзяржава».
ГЛЯДЗІЦЕ ТАКСАМА: Амбасада ЗША будзе зноў выдаваць візы. Але толькі паўтара месяца ГЛЯДЗІЦЕ ТАКСАМА: «Пры Ярузэльскім не было і чвэрці таго тэрору, які цяпер у Беларусі», – былы польскі дыплямат у Менску