У гарадзкім пасёлку Карэлічы, што на Горадзеншчыне, Сьледчы камітэт даслаў позву 8-гадовай дзяўчынцы Ганьне Пякарскай. Разам з бацькам Раманам Пякарскім дачка зарэгістраваная ў Карэлічах. Раман разьмясьціў фота позвы ў Facebook, піша Hrodna.life.
Пякарскі ад 2007 году жыве ў Польшчы, але мае беларускі пашпарт і прапісаны ў Карэлічах. Там сама зарэгістраваная і народжаная ў 2012-м Ганна, якая зьяўляецца грамадзянкай іншай краіны.
За камэнтары ў Telegram супраць Рамана Пякарскага распачалі крымінальную справу, пры гэтым канкрэтны артыкул дасюль застаецца невядомым. На допыт у гэтай справе пачалі выклікаць усіх зарэгістраваных па адрасе.
Позву прыслалі і бацьку Рамана, інваліду І групы. А маці ўжо хадзіла ў Сьледчы камітэт. У яе пыталіся пра сына і сказалі, што прыйдуць зь ператрусам, хаця даўно вядома, што Раман у краіне шмат гадоў не жыве.
ГЛЯДЗІЦЕ ТАКСАМА: Дзяўчыну, якая 3 гады не была ў Беларусі, абвінавачваюць ва ўдзеле ў пратэстах у Менску8-гадовая дачка Рамана была ў Карэлічах некалькі разоў, але ад нараджэньня жыве і вучыцца за мяжой. Позву на яе імя бацька назваў «непрафэсійнай працай супрацоўнікаў». Аднак скардзіцца на дзеяньні СК у Беларусі ён ня бачыць сэнсу.
У прэс-службе Сьледчага камітэту журналістам не пракамэнтавалі здарэньне.
Згодна з арт. 27 Крымінальнага кодэксу крымінальная адказнасьць у Беларусі надыходзіць з 16 гадоў, за некаторыя злачынствы можна прыцягнуць з 14 гадоў. У іншых выпадках адказнасьць за дзіця будуць несьці бацькі. Выклікаць на допыт позвай непаўналетняе дзіця — парушэньне закону.
Пасьля жніўня 2020 году супраць сілавікоў не пачалі ніводнай крымінальнай справы за перавышэньне паўнамоцтваў, катаваньні і забойствы пратэстоўцаў.
ГЛЯДЗІЦЕ ТАКСАМА: Дайшлі да «Бульвара Няскораных». Яшчэ некалькі каналаў і чатаў у Telegram прызналі «экстрэмісцкімі» ГЛЯДЗІЦЕ ТАКСАМА: 7 месяцаў у Латвіі. Як жыве лекарка Дар’я Чэхава, якая зьехала зь Беларусі ад перасьледу