Пра гэта паведамляюць заходнія інфармацыйныя службы.
У суботу, выступаючы на канфэрэнцыі ў горадзе Чэнду, Гао Фу прызнаў праблему невысокай эфэктыўнасьці кітайскіх вакцын: «Мы разглядаем магчымасьць выкарыстаньня іншых вакцын, вырабленых на аснове іншых тэхналёгій».
Паводле Гаа Фу, для павышэньня эфэктыўнасці існуючых кітайскіх вакцын можа спатрэбіцца павелічэньне дазіровак або выкарыстаньне іх разам з вакцынамі, вырабленымі з дапамогай іншых тэхналёгій.
ГЛЯДЗІЦЕ ТАКСАМА: Эўрапейскі рэгулятар правярае вакцыну Johnson & Johnson пасьля выпадкаў трамбозуГэта першае падобнага роду прызнаньне, зробленае афіцыйным кітайскім прадстаўніком. Да гэтага часу афіцыйны Кітай заяўляў аб высокай эфэктыўнасьці сваіх вакцын, вырабленых традыцыйным спосабам, на аснове інактываванага (забітага) каранавірусу.
Сам Гао Фу, які раней публічна выказваў занепакоенасьць з нагоды бясьпекі наватарскіх вакцын, створаных заходнімі кампаніямі на аснове малекулы мРНК, падчас канфэрэнцыі ўпершыню заявіў аб іх высокай эфэктыўнасьці і аб тым, што кітайскія кампаніі ствараюць свае ўласныя вакцыны на аснове новай тэхналёгіі.
ГЛЯДЗІЦЕ ТАКСАМА: Бутан вакцынаваў амаль усё насельніцтва за тыдзень. Як гэта ўдалосяВырабленыя трыма кітайскімі кампаніямі вакцыны былі закуплены некалькімі дзясяткамі краін, сярод якіх Украіна, Турэччына, Бразылія, Інданэзія, Зімбабвэ, нягледзячы на адсутнасць дакладных дадзеных аб выніках клінічных выпрабаваньняў. У выніку тэставаньня, праведзенага ў Бразыліі, вакцына кітайскай фірмы Sinovac паказала эфэктыўнасьць 50,4%, у Турэччыне — 83,5%.
У адказ на просьбу агенцтва Associated Press аб камэнтары Гао Фу растлумачыў, што ён камэнтаваў эфэктыўнасьць вакцын, якія выкарыстоўваюцца ў сьвеце, а не ў Кітаі. У інтэрвію выданьню Global Times, якое выдаецца афіцыйным органам кітайскай кампартыі газэтай «Жэнмінь жыбао», Гао растлумачыў, што яго заявы няправільна інтэрпрэтавалі. Паводле яго, ён гаварыў у агульных рысах пра неабходнасьць павысіць эфэктыўнасьць вакцын.