Сьледзтва ў крымінальнай справе кіраўніка гомельскага аддзяленьня праваабарончага цэнтру «Вясна» Леаніда Судаленкі падоўжылі да 18 траўня, паведаміла «Вясна» з спасылкай на ліст палітвязьня.
Яго вінавацяць паводле арт. 342 Крымінальнага кодэксу «Арганізацыя і падрыхтоўка дзеяньняў, якія груба парушаюць грамадзкі парадак, і фінансаваньне такой дзейнасьці».
Судаленка застаецца пад вартай у гомельскім СІЗА № 3. Ён двойчы абскарджваў меру стрыманьня, аднак яму адмовілі на падставе таго, што праваабаронца нібыта можа ўцячы ці перашкодзіць сьледзтву.
Таксама ў Судаленкі зьмяніўся абаронца: першая адвакатка адмовілася далей займацца ягонай справай без тлумачэньня прычын.
У лісьце праваабаронца павіншаваў беларусаў з Днём Волі. Ён напісаў, што атрымлівае шмат лістоў і ўсё гэта для яго «мае асаблівы сэнс і значэньне».
ГЛЯДЗІЦЕ ТАКСАМА: Сьледзтва супраць актывістаў «Вясны» актывізавалася, вядома пра 5 новых допытаўСудаленку затрымалі 18 студзеня па дарозе ў офіс. Яго адвезьлі на допыт у Сьледчы камітэт, куды яго адвакат змог трапіць толькі бліжэй да вечара.
За два тыдні да затрыманьня ў Грамадзка-палітычным цэнтры на Палескай, 52, дзе месьціцца й офіс «Гомельскай вясны», прайшоў ператрус, падчас якога забралі дакумэнты, якія тычацца дзейнасьці праваабаронцы: пастановы судоў, абскарджваньні і іншае.
Справу Судаленкі перадалі з абласнога Сьледчага камітэту ў Цэнтральны апарат СК у Менску.
ГЛЯДЗІЦЕ ТАКСАМА: Сьледчы камітэт завёў крымінальную справу за дзейнасьць праваабарончага цэнтру «Вясна» ГЛЯДЗІЦЕ ТАКСАМА: Журналіста Андрэя Аляксандрава і яго дзяўчыну паставілі на ўлік як «схільных да экстрэмізму»