Камэнтуючы на просьбу агенцтва БелаПАН прынятую рэзалюцыю Рады ААН у правах чалавека, у якой асуджаюцца дзеяньні ўладаў Беларусі, прэсавы сакратар МЗС Беларусі Анатоль Глаз назваў яе «фарсам» і «хацелкай»
«На сьвет зьявілася чарговая рэзалюцыя зь ліку тых, якія Рада ААН у правах чалавека штампуе пад ціскам асобных краін Захаду на зайздрасьць рэгулярна і пладавіта, — сказаў Глаз. — Сумна, вядома, што шэраг дзяржаў упарта спрабуе ператварыць галоўны праваабарончы орган ААН у мэханізм рэалізацыі сваіх палітычных мэтаў, якія ня маюць ані найменшага дачыненьня да правоў чалавека».
«Хутчэй за ўсё, мы чарговы раз сталі сьведкамі фарсу на тэму „асуджаем Беларусь“, разыгранага Эўразьвязам, які ініцыяваў рэзалюцыю і лабіяваў яе прыняцьце. Проста ЭЗ каторы ўжо раз захацелася расказаць нам, беларусам, як нам жыць у сваёй краіне, — заявіў прэсавы сакратар МЗС. — Мы дакладна абыдземся без такіх павучаньняў. А новую „хацелку“ ЭЗ у выглядзе сьвежай рэзалюцыі РПЧ ААН напаткае тая ж доля, што і мандат спэцыяльнага дакладчыка РПЧ па сытуацыі з правамі чалавека ў Беларусі — нікому, акрамя сваіх гаспадароў, яна ня будзе патрэбная».
- Прынятая сёньня рэзалюцыя Рады правоў чалавека ААН патрабуе ад уладаў Беларусі забясьпечыць правядзеньне свабодных і справядлівых выбараў.
- Рада асудзіла «грубыя парушэньні правоў чалавека ў Беларусі ў сувязі з прэзыдэнцкімі выбарамі 2020 году, у тым ліку сыстэматычную адмову ў правах чалавека і асноўных свабодах, адвольныя затрыманьні і арышты членаў апазыцыі, журналістаў і работнікаў СМІ, праваабаронцаў і грамадзян у цэлым за ажыцьцяўленьне імі правоў чалавека і асноўных свабодаў, а таксама пакараньні ў выглядзе пазбаўленьня волі, прызначаныя работнікам сродкаў масавай інфармацыі за выкананьне імі сваіх прафэсійных абавязкаў».