Прэм’ер-міністар Вялікай Брытаніі Борыс Джонсан сёньня абвяшчае пра рэкордныя інвэстыцыі ў вайскова-прамысловы комплекс за апошнія 30 гадоў.
Як паведаміла BBC, у наступныя чатыры гады брытанскае міністэрства абароны штогод будзе атрымліваць дадатковыя 4 мільярды фунтаў звыш звычайнага гадавога бюджэту. BBC называе гэтае павелічэньне рэкордным. Грошы пойдуць на разьвіцьцё кібэрбясьпекі і праектаў у разьвіцьці касьмічнай прасторы. У рамках гэтых праектаў будзе створана каля 40 тысяч працоўных месцаў.
ГЛЯДЗІЦЕ ТАКСАМА: ЗША і Вялікая Брытанія абвінавацілі Расею ў кібэратаках на ГрузіюНа думку Джонсана, дадатковыя інвэстыцыі павінны дапамагчы Брытаніі «ўзмацніць свой глябальны ўплыў». Сёньня гадавы бюджэт брытанскага Міністэрства абароны складае каля 40 мільярдаў фунтаў. Такім чынам, дадатковыя 16,5 мільярда на працягу чатырох гадоў павялічаць яго прыблізна на 10%.
«Гэта наш шанец завяршыць эпоху адступленьня, пераўтварыць узброеныя сілы, абʼяднацца і разьвіць краіну, укараніць новыя тэхналёгіі, абараніць нашых людзей і лад жыцьця», — сказаў Джонсан.
ГЛЯДЗІЦЕ ТАКСАМА: Ці прагаласавалі б брытанцы за Brexit сёньня. Ёсьць вынікі дасьледаваньняАглядальнік BBC у пытаньнях абароны Джонатан Біл цытуе ценявога міністра абароны Джона Гілі, які заявіў, што дадатковыя сродкі «дапамогуць абароне Вялікай Брытаніі аднавіцца пасьля дзесяцігодзьдзя заняпаду». Ён таксама заклікаў аддаваць прыярытэт высокакваліфікаваным вайскоўцам, а не высокатэхналягічнай зброі.