Зь беларускіх ВНУ на раніцу 3 лістапада адлічылі ўжо 138 студэнтаў, ад пачатку верасьня звольнілі 15 выкладчыкаў, паведамляе «Студэнцкая думка». У адказ на рэпрэсіі студэнты БДУКМ і БДАМ прапанавалі стварыць Агульнакультурніцкае студэнцкае аб’яднаньне, а супрацоўнікі МДЛУ напісалі зварот да рэктара.
У Беларускім дзяржаўным мэдычным унівэрсытэце, паводле зьвестак БелаПАН, на сёньня пацьверджанае 21 адлічэньне, аднак у лісьце ў Мінадукацыі за подпісам прарэктара па выхаваўчай працы Паўла Маркаўцана паведамляецца пра адлічэньне 9 студэнтаў. Студэнты, якія, імаверна, трапілі ў сьпісы, заяўляюць у тэлеграм-каналах «Рупар БДМУ» і «Белыя халаты», што некаторыя адлічаныя ня могуць азнаёміцца з загадамі — у дэканатах кажуць, што такіх дакумэнтаў няма.
Студэнты і выкладчыкі БДМУ пішуць пэтыцыі да кіраўніцтва з патрабаваньнем адмяніць загады аб адлічэньнях і працягваюць выходзіць на акцыі салідарнасьці.
ГЛЯДЗІЦЕ ТАКСАМА: Студэнты 15 беларускіх ВНУ запатрабавалі спыніць рэпрэсіі ў навучальных установахБольш за ўсё выкладчыкаў звольнілі ў Менскім дзяржаўным лінгвістычным унівэрсытэце, дзе яны актыўна падтрымалі страйк студэнтаў. За апошнія дні з ВНУ звольнілі трох выкладчыкаў, яшчэ трое звольніліся самі дзеля салідарнасьці. Дацэнта Натальлю Дуліну затрымалі 30 кастрычніка непадалёк ад МДЛУ і арыштавалі на 14 сутак на падставе часткі 3 артыкула 23.34 КаАП. У адказ студэнты абвясьцілі сэрыю акцый салідарнасьці з выкладчыцай.
З панядзелка ў МДЛУ праходзіць «Тыдзень сініх стужак». А 3 лістапада супрацоўнікі ВНУ перадалі зварот да рэктара з патрабаваньнем вярнуць звольненых выкладчыкаў і студэнтаў. Яго падпісалі каля 70 выкладчыкаў.
Студэнты Беларускага дзяржаўнага ўнівэрсытэту культуры і мастацтваў апублікавалі ў тэлеграм-канале «IN Культ» відэазварот з заклікам да студэнтаў і выкладчыкаў Беларускай дзяржаўнай акадэміі мастацтваў аб’яднацца і стварыць Агульнакультурніцкае студэнцкае аб’яднаньне. Раней у гэтых дзьвюх ВНУ таксама прайшлі масавыя адлічэньні студэнтаў, а ў БДУКМ не працягнулі кантракт старшаму выкладчыку катэдры мэнэджмэнту сацыякультурнай дзейнасьці Дзьмітрыю Матуйзу.
Бацькі студэнтаў-платнікаў БДУІР склалі калектыўны зварот рэктару ВНУ Вадзіму Богушу. Яны патрабуюць абараніць выкладчыкаў унівэрсытэта і спыніць перасьлед студэнтаў за іх погляды. Як распавёў dev.by адзін з бацькоў, зварот ужо падпісалі 130 чалавек. Збор подпісаў працягваецца.
У ВНУ працягваюцца сядзячыя акцыі пратэсту, студэнты масава выходзяць з БРСМ. На шэрагу заняткаў, як паведамляюць студэнцкія тэлеграм-каналы, адбываецца не навучальны працэс, а фактычна італьянская забастоўка — выкладчыкі абмяркоўваюць са студэнтамі страйк.