Гомельскага актывіста Аляксея Раманава за абразу прэзыдэнта будуць судзіць у Хвойніках. Расьсьледаваў крымінальную справу мясцовы аддзел Сьледчага камітэту. Сьледчыя прыйшлі да высновы, што ў словах актывіста ёсьць склад крымінальнага злачынства.
Аляксей Раманаў — інвалід другой групы, мае анкалягічнае захворваньне. Нягледзячы на гэта, ён актыўна ўдзельнічаў у агітацыйных пікетах штабу Сьвятланы Ціханоўскай як валянтэр. На пікеце ў Хвойніках 28 ліпеня ён нэгатыўна выказаўся пра Аляксандра Лукашэнку. Супраць Раманава распачалі крымінальную справу паводле артыкула 368 Крымінальнага кодэксу — абраза прэзыдэнта.
Цяпер сьледзтва скончана, справу перадалі ў раённы суд.
У крымінальнай справе зазначана, што Аляксей Раманаў, «маючы намер публічна абразіць прэзыдэнта, наўмысна прамовіў словы і фразы ў непрыстойнай форме, якія, згодна экспэртызе, зьмяшчаюць нэгатыўную ацэнку прэзыдэнта Аляксандра Лукашэнкі».
ГЛЯДЗІЦЕ ТАКСАМА: Актывіста групы Ціханоўскай з Гомля папярэдзілі ў міліцыі, каб не абражаў прэзыдэнтаЗапіс выказваньняў на Youtube «быў неаднаразова прагледжаны карыстальнікамі інтэрнэту».
Абраза прэзыдэнта караецца штрафам, або папраўчымі працамі на тэрмін да 2 гадоў, альбо арыштам, абмежаваньнем ці пазбаўленьнем волі да 2 гадоў.