Трэцяя гадзіна ночы. Каля абласнога шпіталю ў Гомлі нязвыклы рух. Едуць «хуткія». Вязуць параненых. Тых, каго затрымалі і моцна пабілі ў аўтазаках і міліцыі.
Ноччу ў шпіталі кіпіць праца. Адных — на рэнтген, іншых — на кампутарную тамаграфію. Бо білі па галаве.
«Страшна крычалі людзі»
Перапалоханыя бацькі прывезьлі 16-гадовага сына. Яго ім «аддалі» ў РАУС. Перад гэтым моцна зьбілі.
Бацька падлетка расказаў, што чуў, як у РАУС «страшна крычалі людзі».
Сын чакаў транспарту на прыпынку ў цэнтры гораду. На яго раптоўна наляцелі і затрымалі, сказаў бацька.
Іншых таксама затрымалі ў цэнтры пасьля паловы на 11-ю вечара.
«Вы фашысты, найміты, прадалі Радзіму!»
22-гадовы Аляксей расказаў, як яны зь сябрамі ішлі дахаты і хоць бачылі аўтазак, але вырашылі, што спакойна пройдуць міма, бо нічога не парушаюць. Аднак іх спынілі і абшукалі.
«Потым зацягнулі нас траіх у аўтазак і пачалі біць. Білі нас рукамі, нагамі, дручкамі, увесь час абражалі. Матамі рознымі. Нічога не тлумачылі.
Крычалі нейкае трызьненьне: „Вы фашысты, вы найміты, прадалі Радзіму!“. Што намі кіруюць з Польшчы, што мы здраднікі, што нас варта ставіць да сьценкі і расстрэльваць.
Пасьля яны завезьлі нас у Цэнтральны аддзел міліцыі. І там працягвалі зьбіваць. Ці яны, ці іншыя міліцыянты, я ня ведаю, бо яны ўсе ў масках былі і не называліся», — расказаў Аляксей.
Паводле яго, затрыманых паклалі тварам у падлогу ў актавай залі, зьвязалі рукі за сьпінамі і зноў пачалі біць нагамі і дручкамі.
«Яны крычалі: „Дзе вашы рэчы, вы ж ехалі нас забіваць!“».
Потым паклалі ў калідоры і працягвалі біць там.
«У калідоры было шмат людзей, некалькі дзясяткаў дакладна. Павялі складаць пратакол. Мне зрабілася блага, у мяне сэрца забалела, ціск падняўся... Мне выклікалі „хуткую“, і вось я ў шпіталі. Цяпер паперы маю, што ў мяне чэрапна-мазгавая траўма. Бо білі па галаве.
Не вярнулі маіх рэчаў. Забралі грошы і ключы ад кватэры. Я патрабаваў вярнуць — кажуць, няма, не знайшлі», — зазначыў Аляксей.
Таксама міліцыянты прымусілі яго разблякаваць тэлефон.
«Залезьлі там у сацыяльныя сеткі і нешта пісалі ад майго імя. Потым прымусілі скінуць налады да заводзкіх», — дадаў малады чалавек.
«Колькі вам заплацілі? Дзе грошы?»
Андрэя і Віктара затрымалі, калі яны іншлі дахаты з кавярні.
«Я пабег уцякаць, — расказаў Андрэй. — Потым спыніўся, яны пачалі адразу мяне біць дручкамі, рукамі, нагамі і крычалі: „Колькі вам заплацілі? Дзе грошы?“. Абражалі ўвесь час, страшнымі матамі. Пагражалі потым, у аўтазаку, што яны нас згвалцяць, заб’юць. Завезьлі некуды, я толькі бачыў лесьвіцу і спартовую залю. Нас паклалі на падлогу. Калі мне зрабілася блага, то выклікалі „хуткую“. Вось чакаем заключэньня траўматоляга», — Андрэй моцна напалоханы.
ГЛЯДЗІЦЕ ТАКСАМА: «Прымушаюць людзей маліцца і малоцяць дручкамі». Аповед расейскага журналіста, якога затрымалі ў Менску
«Калі яны глядзелі відэа, то рабіліся яшчэ больш агрэсіўнымі»
40-гадовы жыхар Гомля ехаў дахаты на ровары. Не даехаў 100 мэтраў. «Мяне ўзялі каля „Макдональдса“. Адразу пачалі біць і абражаць, пыталіся, дзе тыя „50 рублёў, якія табе заплацілі за акцыю“. Пырснулі пярцовым газам. Білі галавой аб ганак.
Мяне прывезьлі ў Чыгуначны РАУС. Там стаяў гурт вельмі агрэсіўна настроеных міліцыянтаў. Завялі ў спартовую залю, паклалі тварам у падлогу. Там працягвалі біць і зьневажаць. Потым прыкавалі кайданкамі да брамкі — гэта было ў спартовай залі. Там было чалавек дваццаць такіх, як я.
Міліцыянты глядзелі ў тэлефонах тое, што адбываецца на вуліцах Беларусі, і рагаталі. Мне здаецца, ад праглядаў відэа яны рабіліся яшчэ больш агрэсіўнымі. Калі я паспрабаваў падняцца, мяне зьбілі з ног. Я пачаў траціць прытомнасьць. „Хуткая“ завезла мяне ў шпіталь. У мяне чэрапна-мазгавая і іншыя траўмы», — расказаў гамяльчук.
ГЛЯДЗІЦЕ ТАКСАМА: «Турму на Акрэсьціна ператварылі ў канцлягер». Праваабаронца Бяляцкі пра беспрэцэдэнтны гвалт ГЛЯДЗІЦЕ ТАКСАМА: «Усе затрыманыя — пазытыўныя людзі». Гісторыя магіляўчанкі, якая двое сутак праседзела за бел-чырвона-белы сьцяг ГЛЯДЗІЦЕ ТАКСАМА: Бацькам непаўналетніх дзяцей далі па 15 сутак, дзеці засталіся адны. Гісторыя тарану легкавіка міліцэйскім джыпам у Менску ГЛЯДЗІЦЕ ТАКСАМА: «У дзіцяці ўвесь твар быў у крыві». У Горадні падчас аварыі з «Тыграм» пацярпела 5-гадовая дзяўчынка, у яе ЧМТ