Галоўны трэнэр беларускай зборнай у веславаньні на байдарках і каноэ Ўладзімер Шантаровіч у інтэрвію спартоваму сайту «Трыбуна» пракамэнтаваў скандальныя выказваньні сваіх выхаванак.
Раней бронзавая прызэрка Алімпіяды-2016, чэмпіёнка сьвету і Эўропы Маргарыта Махнева заявіла, што не разумее, навошта патрэбна беларуская мова, калі ўсе гавораць па-расейску. А двухразовая прызэрка Гульняў у Лёндане і Рыа-дэ-Жанэйра Марына Літвінчук раскрытыкавала тых, хто зьбірае подпісы за альтэрнатыўных кандыдатаў.
ГЛЯДЗІЦЕ ТАКСАМА: Алімпійская прызэрка з Хойнікаў заявіла, што ёй не патрэбна беларуская моваСловы Маргарыты — гэта выключна яе разуменьне, лічыць спэцыяліст. Сам жа ён называе беларускую мову «спрадвечнай». Прызнаецца, што шмат чытае па-беларуску, вялізную колькасьць беларускіх кніг раздарыў па ўсім сьвеце. Лепшай мовы няма ў сьвеце, падсумаваў ён.
«Беларуская мова — яна нашая, нацыянальная. І ў яе такія ж правы, як у расейскай. Мы не павінны гэтую мову забываць. Калі забудзем — загубім краіну», — сказаў Шантаровіч, дадаўшы, што для падобных размоваў людзі павінны сасьпець.
ГЛЯДЗІЦЕ ТАКСАМА: «З Лукашэнкам у нас тое, што трэба». Як беларускія спартоўцы крытыкуюць апанэнтаў улады«Ня проста пустату малоць, як у нас часта робіцца. Калі чалавек нешта гаворыць, значыць, у яго ёсьць нейкі жыцьцёвы досьвед, погляды на тую ці іншую сытуацыю. Мне ўжо неўзабаве 70, я шмат чаго прайшоў, многае разумею. Ведаю, якой краіна была ў 1990-я, бачу, якая яна цяпер. Але мы не павінны замыкацца ў сваім коле, а трэба жыць, глядзець на суседзяў і разьвівацца», — сказаў Уладзімер Шантаровіч.
Заявы Маргарыты Махневай у гутарцы са Свабодай крытыкаваў і вядомы гандбаліст, алімпійскі чэмпіён Андрэй Барбашынскі.
ГЛЯДЗІЦЕ ТАКСАМА: «Хто зарабляе 250 даляраў, ня думае пра новую мэблю». Як алімпійскі чэмпіён вядзе бізнэс ва ўмовах каранакрызісуТаксама Ўладзімер Шантаровіч выказаўся і пра выбарчую кампанію. Асабіста яму імпануюць некаторыя кандыдаты, напрыклад Валер Цапкала. Хоць на 70-80% вызначыўся, што будзе галасаваць на выбарах за цяперашняга кіраўніка краіны.
«Мне спадабаліся погляды і падыходы Цапкалы да пэўных момантаў. Пра іх ён казаў у розных інтэрвію. Але пакуль нічога канкрэтнага ў яго ўсё роўна ня ўбачыў. Напрыклад, хто будзе вырашаць існыя праблемы? Ён кажа, што за пяць гадоў выканае нейкую сацыяльна-эканамічную праграму. А як і з кім? Вось гэта хацелася б пачуць», — сказаў трэнэр зборнай Беларусі.