Як прайшоў першы дзень жорсткага пандэмічнага карантыну ў 3-мільённым Кіеве, паведамляе карэспандэнтка Свабоды.
Мэтро закрылі
У Кіеве з 18 сакавіка не працуе галоўны від транспарту — мэтро. Да таго ж гарадзкія ўлады забаранілі грамадзянам карыстацца наземным транспартам бяз масак. Раніцай у горадзе быў транспартны каляпс — на прыпынках утвараліся доўгія чэргі пасажыраў, а кіроўцы не маглі выканаць норму перавозу ў аўтобусе, тралейбусе ці маршрутцы толькі 10 асобаў, як загадалі ўлады.
Урадавы квартал, у якім амаль штодня праходзілі акцыі, у зацішшы
«У тэлевізары ўлады абвясьцілі ўмовы і сказалі, што кіроўцы мусяць кантраляваць колькасьць пасажыраў. А як гэта зрабіць? Раніцай на прыпынках была велізарная колькасьць людзей. Усім трэба дабрацца на працу. А як гэта зрабіць? Улады абяцалі, што будзе дапамагаць Нацыянальная гвардыя. Але дагэтуль я нідзе нікога ня бачыў», — сказаў Свабодзе кіроўца гарадзкога аўтобуса.
Кіроўца кажа, што мяняе маску кожныя дзьве гадзіны
Ён кажа, што кіраўніцтва забясьпечыла супрацоўнікаў маскамі.
«Але сярод пасажыраў у масках адзінкі. Як можна захаваць бясьпечную дыстанцыю пры такой колькасьці людзей?» — дадае кіроўца.
З найбольшымі траспартнымі праблемамі сутыкнуліся жыхары прылеглых да Кіева паселішчаў, бо ў сфэры абслугоўваньня — у крамах і на запраўках — працуюць збольшага яны. У лякарнях сярэдні мэдычны пэрсанал таксама пераважна прыежджы.
Калі няма як трапіць у гарадзкі пасажырскі транспарт, людзі часьцей пачынаюць карыстацца таксоўкамі. Каля зачыненых станцыяў мэтро чакаюць па некалькі машын таксі.
Асабістага транспарту на вуліцах Кіева пабольшала. І затораў таксама
«Сёньня езьдзіла ў цэнтар на таксі. Мяне ўразіла, што на вуліцах значна менш людзей, многія ў масках, і ўсё выглядае крыху трывожна. З падазрэньнем людзі ставяцца нават да чалавека, які неасьцярожна кашлянуў пасьля выкуранай цыгарэты. Але аўтамабільных „цягнучак“ у горадзе менш ня стала», — падзялілася ўражаньнямі са Свабодай кіяўлянка Антаніна.
Рэстараны і гандлёвыя цэнтры закрытыя
Яшчэ ўчора шматлюдныя мясціны Кіева апусьцелі. Закрытыя кавярні, рэстараны і гандлёвыя цэнтры. Каля аднаго з найбольшых транспартных вузлоў Кіева — станцыі мэтро «Почайна», празь якую штодня перамяшчаліся да паўмільёна пасажыраў, выкарыстоўваючы зручную перасадку з прыгарадных электрычак, — амаль пуста.
У гэтым раёне сканцэнтравана шмат гандлёвых цэнтраў. У іх цяпер працуюць толькі прадуктовыя супэрмаркеты. Паркоўкі, дзе два дні таму цяжка было знайсьці вольнае месца, таксама пустыя.
Бізнэс вымушана спыніўся. Але можна запаркавацца
Але і ў прадуктовых крамах натоўпу няма. Адпаведна няма ажыятажу або дэфіцыту прадуктаў. Два дні таму найбольш запатрабаванымі таварамі была мука, макарона і туалетная папера. Наведнікаў таксама вельмі мала.
У прадуктовых крамах — усе ў масках, але наведнікаў няшмат
Грыўня пачала падаць
Закрытыя рэчавыя і кніжныя рынкі. 17 сакавіка Нацыянальны банк Украіны павялічыў інтэрвэнцыю на міжбанкаўскай біржы да 300 мільёнаў даляраў, каб стрымаць курс нацыянальнай валюты. Яшчэ тры дні таму ў абменьніках можна было купіць даляр за 25 грыўняў, а сёньня — ужо па 29.
«Навошта вы фатаграфуеце? Каб потым у сацыяльных сетках паніку ствараць? У нас усё нармальна і ўсё спакойна. Беражонага Бог беражэ», — абурылася ўласьніца аднаго з гандлёвых пунктаў. Яна зьбіраецца прыходзіць штодзень на рынак, каб кантраляваць сытуацыю.
Людзі ў Кіеве не панікуюць, але абураюцца тым, што ўлада ўвяла жорсткія абмежаваньні, не парупіўшыся пра тое, як людзям іх выконваць.
Антысэптык зь беларускай «Зуброўкі»
Галоўны дэфіцыт — індывідуальныя сродкі абароны. Антысэптыкаў і масак у аптэках няма.
У аптэках ёсьць усё, апроч масак і антысэптыкаў
«Мы замаўляем іх штодня, але нам іх не прывозяць», — скардзіцца правізар адной з аптэк. Каб абараніць сябе і сваіх родных, людзі шыюць маскі і робяць антысэптыкі самі. Карыстальнікі сацыяльных сетак дзеляцца досьведам, як сшыць маску, і дапамагаюць блізкім, вымушаным штодзень хадзіць на працу.
А адзін з кіяўлянаў падзяліўся сваім рэцэптам самаробнага антысэптыку:
«Не паверыце, напэўна, — сказаў ён, даведаўшыся, што размаўляе з карэспандэнтам беларускай службы Радыё Свабода. — Антысэптык зрабіў сам. Зь беларускай „Зуброўкі“. Дадаў яшчэ крыху гліцэрыны і пераліў у пульвэрызатар. Цяпер карыстаюся ім па некалькі разоў у дзень — пасьля транспарту ці ўсякага іншага кантакту з „чужымі“ паверхнямі».
Што трэба ведаць пра новы каранавірус COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ