Актор Хаакін Фэнікс, які выканаў галоўную ролю ў фільме «Джокер», арыштаваны паліцыяй за ўдзел у дэманстрацыі ў Вашынгтоне, паведамляе выданьне Variety. Усяго паліцыяй арыштаваныя 147 чалавек, сярод іх — зорка фільму Фрэнсіса Форда Копалы «Апакаліпсіс сёньня» Марцін Шын, перадае CNN.
Акцыя пратэсту ў падтрымку барацьбы з глябальным пацяпленьнем прайшла ў ноч на суботу па беларускім часе ў цэнтры Вашынгтону. Яна арганізаваная ў рамках штотыднёвых выступаў супраць глябальнага пацяпленьня двухразовай уладальніцай «Оскара» Джэйн Фондай і праходзіла 14 тыдняў запар.
joaquin phoenix talked about how the meat & dairy industry contribute to climate change and that we can make changes to our daily routine to make a difference.jane fonda said “i didn’t invite him, he came of his own volition”. pic.twitter.com/ooJwGcBxOS
— kaz. (@joaquinsjoker) January 10, 2020
Паліцыя выставіла арыштаваным абвінавачваньні ў парушэньні грамадзкага парадку. З кастрычніка паліцыя арыштоўвала і іншых удзельнікаў пратэстаў, у тым ліку саму Фонду, Сэма Ўотэрстана, Тэда Дэнсана, Кэтрын Кінэр і іншых галівудзкіх актораў.
Драма «Джокер» Тода Філіпса перамагла ў мінулым годзе на Вэнэцыянскім кінафэстывалі, Фэнікс атрымаў за выкананьне ролі «Залаты глобус» і разглядаецца крытыкамі як галоўны прэтэндэнт на «Оскара» за найлепшую мужчынскую ролю ў гэтым годзе. У карціне галоўнага героя арыштоўвае паліцыя, але яго вызваляюць пратэстоўцы.