Суд у Кіеве абавязаў Нацыянальнае антыкарупцыйнае бюро Ўкраіны адкрыць вытворчасьць у дачыненьні да пятага прэзыдэнта Ўкраіны Пятра Парашэнкі і міністра замежных справаў Паўла Клімкіна паводле абвінавачаньня ў злоўжываньні ўладай. Пра што канкрэтна ідзе гаворка і хто пазоўнік — пакуль невядома.
Адпаведнае рашэньне Саламянскі раённы суд Кіева прыняў 15 жніўня.
Былы прэзыдэнт і кіраўнік МЗС пакуль не камэнтавалі абвінавачаньняў на свой адрас.
Апошнімі тыднямі Дзяржаўнае бюро расьсьледаваньняў дапытвала Парашэнку ў якасьці сьведкі ў справе аб ухіленьні ад сплаты падаткаў і наступнай легалізацыі даходаў падчас куплі-продажу ТАА «Тэлеканал „Прямий“».
ГЛЯДЗІЦЕ ТАКСАМА: Экс-прэзыдэнта Ўкраіны Парашэнку дапытваюць сьледчыяСам Парашэнка адмаўляе сваю датычнасьць да валоданьня «Прамым», а вытворчасьць Дзяржаўнага бюро расьсьледаваньняў (ДБР) назваў «рэйдэрствам і зьнішчэньнем свабоды слова», «ініцыятар» якіх нібыта — былы намесьнік кіраўніка адміністрацыі прэзыдэнта Віктара Януковіча Андрэй Партноў.
Дырэктар ДБР Раман Труба і Андрэй Партноў адмаўляюць словы Парашэнкі.