Прапанова Польшчы аб прызначэньні спэцпрадстаўніка генэральнага сакратара ААН у пытаньнях Украіны не была ўхваленая ў арганізацыі, паведамляе «Укрінформ» са спасылкай на словы міністра замежных спраў Польшчы Яцэка Чапутовіча.
Польскі міністар лічыць, што патрэбны новыя інструмэнты ў пошуку рашэньня, якое спыніла б вайну ва Ўкраіне.
Яцэк Чапутовіч
«Так, можна было б прызначыць спэцыяльнага прадстаўніка генэральнага сакратара ААН, каб ён сачыў за тым, што адбываецца на Данбасе, ва Ўкраіне. Ёсьць жа такія спэцыяльныя прадстаўнікі ў іншых рэгіёнах. Чаму б ня мець такога чалавека ва Ўкраіне? Гэтая ідэя... не была ўспрынятая, не была ўхваленая», — сказаў Яцэк Чапутовіч.
Раней ён заяўляў аб падтрымцы Польшчай прапановы прэзыдэнта Ўкраіны пашырыць «нармандзкі фармат» і прыцягнуць да перамоваў ЗША і Вялікую Брытанію.
Узброены канфлікт на Данбасе працягваецца З 2014 году пасьля расейскай акупацыі Крыму. Украіна і Захад абвінавачваюць Расею ва ўзброенай падтрымцы баевікоў. Крэмль абвяргае гэтыя абвінавачваньні і заяўляе, што на Данбасе могуць знаходзіцца хіба што расейскія «добраахвотнікі».
Згодна з ацэнкай ААН, паводле стану на 31 сьнежня 2018 году, з прычыны ўзброенага канфлікту на Данбасе загінулі ад 12,8 да 13 тысяч чалавек.
ГЛЯДЗІЦЕ ТАКСАМА: Беларусы, якія загінулі на Данбасе ў баях за Ўкраіну і «ЛДНР». Сьпісы з абодвух бакоў ГЛЯДЗІЦЕ ТАКСАМА: Зяленскі звольніў прадстаўніка Ўкраіны на менскіх перамовах па Данбасе празь месяц пасьля прызначэньня ГЛЯДЗІЦЕ ТАКСАМА: Пасьля гібелі чатырох украінскіх вайскоўцаў на Данбасе Зяленскі другі раз патэлефанаваў Пуціну