Справу аб двайным забойстве ў стаўпецкай школе перадалі ў суд

Генэральная пракуратура Беларусі перадала ў Менскі абласны суд справу аб двайным забойстве ў школе №2 ў Стоўпцах.

«Вывучыўшы матэрыялы крымінальнай справы, якую вяло галоўнае сьледчае ўпраўленьне Сьледчага камітэту Рэспублікі Беларусь, у Генэральнай пракуратуры прыйшлі да высновы аб абгрунтаванасьці абвінавачаньня, поўным і аб'ектыўным дасьледаваньні абставінаў злачынстваў, пагадзіліся з кваліфікацыяй дзеяньняў абвінавачванага, — сьцьвярджаецца на сайце ведамства. — Выбраная мера стрыманьня ў выглядзе ўзяцьця пад варту пакінутая бязь зьмены».

Сьледчы камітэт 5 ліпеня паведаміў аб завяршэньні расьсьледаваньня крымінальнай справы. Абвінавачаньне 16-гадоваму школьніку выстаўлена паводле трох артыкулаў:

• забойства дваіх чалавек з асаблівай жорсткасьцю з хуліганскіх матываў (ч. 2 арт. 139 КК РБ);
• замах на забойства двух чалавек з асаблівай жорсткасьцю з хуліганскіх матываў (ч. 1 арт. 14 і ч. 2 арт. 139 КК РБ);
• асабліва злоснае хуліганства (ч. 3 арт. 139 КК РБ).

Папярэдне казалі пра абвінавачаньне толькі паводле першых двух пунктаў.

Здарэньне адбылося 11 лютага ў стаўпецкай школе №2, нападнік забіў нажом настаўніцу гісторыі і вучня 11-й клясы. Абвінавачваны часткова прызнаў віну.

За двайное забойства ў Беларусі могуць пакараць нават пажыцьцёвам зьняволеньнем і расстрэлам, але непаўналетнім такога не прысуджаюць. Максымальны тэрмін для тых, хто зрабіў такое злачынства ва ўзросьце 14–16 гадоў — 12 гадоў турмы (да 13 гадоў у суме прысудаў).

Абвінавачваны застаецца пад вартай, справа перададзеная пракурору для накіраваньня ў суд. Ягоны бацька адмовіўся камэнтаваць Свабодзе справу.

У час расьсьледаваньня, піша СК, аднавілі храналёгію падзеяў з дапамогай відэакамэр назіраньня, паказаньняў абвінавачванага, сьведак і пацярпелых. Выявілася, што:

• незадоўга да забойстваў абвінавачваны ўдарыў малатком аднаклясьніка, але абышлося нязначнай ранай;
• меў пры сабе ня толькі малаток і нож, але таксама «піратэхнічныя вырабы»;
• напаў на настаўніцу і вучняў, «дэманструючы сваю ўяўную перавагу і выключнасьць адносна навакольных»;
• у школьным кабінэце нанёс настаўніцы «ня менш за два» ўдары нажом, выбег з кабінэта, нанёс раненьні двум аднаклясьнікам, якія спрабавалі яго спыніць, зайшоў у іншы кабінэт і нанёс удары нажом вучню 11-й клясы;
• выйшаў у калідор, пагражаў нажом намесьніку дырэктара і настаўніку біялёгіі, спусьціўся ў вэстыбюль, пагражаў нажом аднаклясьніцы, падрапаў ім ейную шыю, уцёк;
• паводле псыхоляга-псыхіятрычнай экспэртызы, «мог у поўнай ступені асэнсоўваць значэньне сваіх дзеяньняў і кіраваць імі.