Дзяржаўны камітэт маёмасьці выставіў на продаж 84,46% акцыяў ААТ «Купалінка». Цана не называецца, але на пакупніка накладаецца шэраг абавязкаў.
Ад пакупніка патрабуюць:
- унесьці ў статутны фонд таварыства ня менш як 10 млн рублёў (каля 4,85 млн даляраў);
- павялічыць аб’ёмы вытворчасьці на 20% у грашовым вымярэньні;
- за 2021 год забясьпечыць экспарт прадукцыі на ня менш як 3 млн даляраў;
- стварыць ня менш за 40 працоўных месцаў;
- забясьпечыць сярэдні заробак работнікаў, не ніжэйшы за заробкі на іншых тэкстыльных прадпрыемствах Беларусі;
- захаваць гандлёвую марку «Купалінка».
Пра зацікаўленасьць ў куплі прадпрыемства пакуль ніхто не заяўляў.
Два тыдні таму «Купалінка» адзначыла 50-годзьдзе. На фабрыцы вырабляецца шмат відаў мужчынскага, жаночага і дзіцячага адзеньня і бялізны – кампанія заяўляе пра больш як 1000 мадэляў у асартымэнце і штомесячнае абнаўленьне да 30% асартымэнту.
Сярэдняя колькасьць работнікаў кампаніі — звыш 700 чалавек. За 2018 год выручка ад продажу прадукцыі склала 17,648 млн рублёў.
«Купалінка» застаецца адным з найбуйнейшых прадпрыемстваў «Беллегпраму». Але фабрыка не ўваходзіць у сьпіс «стратэгічна значных» прадпрыемстваў, якія Лукашэнка забараняе «прадаваць за бясцэнак».
ГЛЯДЗІЦЕ ТАКСАМА: Былы старшыня «Беллегпраму» заступіўся за сэканд-хэнды