Пасьля крытыкі Аляксандра Лукашэнкі ў канцы сакавіка за неадпаведнае ўтрыманьне жывёлаў заведзена 15 крымінальных спраў, паведаміў старшыня Камітэту дзяржкантролю Леанід Анфімаў у праграме «Размова ў прэзыдэнта» на тэлеканале «Беларусь-1».
«Парушэньняў у АПК выяўлена шмат. Тое, што мы пасьпелі праверыць — а нашымі сіламі дайсьці да кожнай гаспадаркі нерэальна, — 2490 парушэньняў зафіксавана на правераных аб’ектах. Апэратыўна ўдалося ліквідаваць больш за 77% зь іх», — удакладніў ён.
Паводле Анфімава, па выніках праверак:
- заведзена 15 крымінальных спраў,
- да дысцыплінарнай адказнасьці прыцягнулі 86 кіраўнікоў і спэцыялістаў райвыканкамаў, 623 сельскагаспадарчыя арганізацыі,
- да адміністрацыйнай адказнасці — 196 кіраўнікоў і спэцыялістаў сельгасарганізацый.
«Мы будзем на працягу пэўнага часу трымаць кіраўнікоў у тонусе, каб той парадак, які мы змаглі навесьці ў ходзе гэтай вясновай кампаніі, застаўся прынамсі на некалькі гадоў. І будзем падтрымліваць гэты парадак на пастаяннай аснове. А то і цяпер, бывае, прыяжджаеш у тую ці іншую гаспадарку, а там ніхто і ня чухаўся. Думаюць: „Раптам нас пранясе“. Не пранясе», — заявіў кіраўнік КДК.
ГЛЯДЗІЦЕ ТАКСАМА: Лічба дня. Дзяржкантроль выявіў больш за 1300 «забруджаных гноем» фэрмаў26 сакавіка падчас паездкі па Магілёўскай вобласьці Аляксандар Лукашэнка завітаў у малочны комплекс «Сьліжы» ў Шклоўскім раёне, які ўваходзіць у аргахолдынг «Купалаўскае», абурыўся кепскімі ўмовамі ў кароўніку, параўнаўшы іх з Асьвенцімам. Ён загадаў зьняць з пасадаў «усіх вінаватых», пагражаў прызначэньнем у Шклоўскі раён кіраўніцы сваёй адміністрацыі Натальлі Качанавай, адстаўкай — віцэ-прэм’еру Міхаілу Русаму і свайму памочніку Генадзю Лаўранкову.
Пасьля абурэньня Лукашэнкі ў адстаўку адправілі шэраг буйных чыноўнікаў. Першым сваю пасаду страціў кіраўнік Магілёўскай вобласьці Ўладзімір Даманеўскі. 27 сакавіка Лукашэнка адправіў у адстаўку віцэ-прэм’ера Міхаіла Русага і міністра сельскай гаспадаркі Леаніда Зайца.
1 красавіка стала вядома, што былы міністар сельскай гаспадаркі Леанід Заяц зойме пасаду старшыні Магілёўскага аблвыканкаму, а былы віцэ-прэм’ер Міхаіл Русы — пасаду памочніка прэзыдэнта — інспэктара Магілёўскай вобласьці, паведаміла прэс-служба Лукашэнкі. Пры гэтым Лукашэнка падкрэсьліў, што іх адстаўка — не «экспромт празь нейкую фэрму ў Сьліжах».
ГЛЯДЗІЦЕ ТАКСАМА: Колькі ў Беларусі фэрмаў з «абас…ымі каровамі» і чаму так склалася. Тлумачыць Ярашук ГЛЯДЗІЦЕ ТАКСАМА: «Вельмі крыўдна мне за „Асьвенцім“, хлопцы!» Рэпартаж з той самай малочнай фэрмы. ФОТА ГЛЯДЗІЦЕ ТАКСАМА: «Усіх пад нож». Тэлеканал АНТ паказаў разнос Лукашэнкі на Шклоўшчыне без купюр